Lajme

Tahiri i AAK-së: Është momenti që nesër pozitë e opozitë t’i japin mbështetje koeficientit të pagave në 129 euro

Autori: Gazeta inFokus 20:01 | 25 October 2023

Shefi i GP-së së AAK-së, Besnik Tahiri, deklaron se shumë familje nuk arrijnë të mbyllin muajin si pasojë e çmimeve të larta të artikujve bazik. Prandaj, me ftesë të kësaj partie nesër deputetët e Kuvendit të Kosovës do të debatojnë në lidhje me nevojën për ngritjen e koeficientit të pagave.

Në debatin e ftuar nga AAK, do të kërkohet që të ndahet buxhet për rritje të koeficientit në minimum 129 Euro.

“Është momenti i fundit që gjithë deputetët, pozitë e opozitë, me votën e tyre t’i japin mbështetje rezolutës së Aleancës për rritjen e pagave”, shkruan Tahiri, transmeton Express.

-Advertisement-

Postimi i tij i plotë:

Me ftesë të grupit parlamentar të AAK-së, nesër deputetët e Kuvendit të Kosovës do të debatojnë në lidhje me nevojën për ngritjen e koeficientit të pagave.

Është momenti i fundit që gjithë deputetët, pozitë e opozitë, me votën e tyre t’i japin mbështetje rezolutës së Aleancës për rritjen e pagave! Varfëria ka emër dhe adresë. Nga muaji në muaj qytetarët tanë po shohin se si artikujve bazik iu luajnë çmimet për 10%, 20% apo 50%. Për jetën e qytetarëve tanë, kjo nënkupton ulje e menjëhershme e konsumit dhe e standardit të tyre jetësor. Për shumicën kjo gjeneron presion maksimal.

Për shumë, kjo është thyerje dhe zhgënjim. Janë shumë familje që nuk arrijnë as të mbyllin muajin. Të tjerët detyrohen t’i kufizojnë shërbimet për fëmijët e tyre. Të moshuarit varen edhe më shumë nga përkrahja familjare e sociale. Prindërit nuk ia arrijnë t’ia dalin dhe as ta balancojnë nevojën për më shumë angazhim për pak më shumë të hyra, me nevojën për më shumë përkushtim ndaj jetës familjare. Të rinjtë ikin duke mos parë perspektivë zhvillimi dhe standardi për ta.

Në debatin parlamentar të ftuar nga ne, do të propozojmë që të ndahet buxhet për rritje të koeficientit në minimum 129 Euro.

Subscribe në YouTube: GAZETA INFOKUSI