Lajme

“Ta heqim çdo dilemë që e kemi me njëri-tjetrin, na duhet paqe para betejës”, Konjufca thirrje bashkëpartiakëve

Autori: Gazeta inFokus 13:48 | 05 October 2024

Kryetari i Kuvendit, Glauk Konjufca, i cili është edhe nënkryetari i Lëvizjes Vetëvendosje, në mbledhjen e Këshillit të Përgjithshëm të kësaj partie, i ka bërë thirrje bashkëpartiakëve të tij që të heqin “çdo dilemë me njëri-tjetrin” para se të hyjnë në garën zgjedhore, të cilën ai e quajti “betejë” në fillim.

Ai tha se kjo mbledhje e Këshillit mund të jetë e fundit “para se të shkojmë në betejë, sepse zgjedhjet janë njëfarë beteje”.

“Disa gjëra të rëndësishme kur njeriu niset në betejë. Është një gjendje e caktuar shpirtërore. Kur jemi në përgjegjësitë tona, mund të na ndodhin probleme e defekte, nuk po them që s’kemi bërë gabime ndonjëherë, mund të bësh lëshime. Relacionet pastaj ndërnjerëzore e marrin njëfarë forme jo bash të këndshme kur ka aso veprime. Mirëpo, krejt këto marrin fund kur jemi duke u përgatitur për të shkuar në betejë. Atëherë duhet të transformojmë gjendjen shpirtërore dhe të hyjmë në një modus tjetër të funksionimit”.

-Advertisement-

Konjufca tha se ka nisur këtë proces të “transformimit” vetë.

“E para që ne t’i heqim çdo dilemë të mundshme që e kemi me njëri-tjetrin. Neve na duhet një paqe dhe një dashuri shumë e sigurt me njëri-tjetrin sepse jemi po këta që e kemi pru Lëvizjen Vetëvendosje në subjektin më të madh në Kosovë”.

Konjufca tha se me qeverisjen e Vetëvendosjes dhe me veprimet e saj para se të vijë në pushtet ka hyrë në historinë e vendit dhe se kanë “lënë gjurmë që do të jetojnë vite prapa kur nuk do të jemi edhe vetë|.

“Ne përmes veprimeve tona, Lëvizja Vetëvendosje tashmë është bërë pjesë e historisë. E ka formësuar Kosovën me veprimet e veta, prej vitit 2005 gjatë rezistencës tonë gjatë kundërshtimit të proceseve negative, kryesisht negociatat me Serbinë, luftimin shumë të fuqishëm të korrupsionit e pastaj me arrit me bë Qeverinë dhe me marrë vendime për Kosovën, pra kjo i bie që je pjesë e historisë”.

Konjufca i falënderoi prej “zemrës, sinqerisht” aktivistët e Vetëvendosjes.

“Baza e Lëvizjes Vetëvendosje është aktivisti. Ai e mban Lëvizjen”.

Subscribe në YouTube: GAZETA INFOKUSI
Aeroporti “Adem Jashari” ka një kërkesë për udhëtarët që kanë humbur valixhet e tyre
-Advertisement-

Të tjera

Fokusi

lajme