Lajme

Szunyog viziton vendpunishten e Fakultetit të ri të Shkencave Matematike-Natyrore të financuar nga BE-ja

Autori: Gazeta inFokus 13:35 | 29 July 2024

Ambasadori i BE-së në Kosovë, Tomas Szunyog, vizitoi sot vendpunishten ku po ndërtohet Fakulteti i ri i Shkencave Matematike-Natyrore i Universitetit të Prishtinës, i shoqëruar nga përfaqësues të UP-së, UNOPS-it, si dhe nga Ambasadorët e Rinj Evropianë.

Në njoftimin e Zyrës së BE-së thuhet se kjo strukturë moderne, e financuar me një grant prej 8.9 milionë eurosh nga BE-ja, tregon përkushtimin e BE-së për përmirësimin e arsimit dhe zgjerimin e kapaciteteve për hulumtime në Kosovë.

Szunyog theksoi se duke përmirësuar standardet e cilësisë në arsimin e lartë, janë krenarë që po mbështesin gjeneratën e ardhshme të shkencëtarëve dhe hulumtuesve të Kosovës

-Advertisement-

“Në muajin shkurt që lamë pas, në këtë vend mora pjesë në ceremoninë e vënies së gurthemelit për këtë projekt ambicioz të financuar nga BE-ja. Sot, më bëhet shumë qejfi kur shoh përparim në ndërtim. Investimi i BE-së në këtë projekt nuk ka të bëjë thjesht me ndërtimin e infrastrukturës, ka të bëjë me ndërtimin e një ardhmërie më të ndritur dhe të bazuar në njohuri për Kosovën”, u shpreh Szunyog.

Me përfundimin e punimeve, ndërtesa e re do t’u shërbejë më shume se 2,300 studentëve dhe 133 anëtarëve të stafit në pesë departamente: matematikë, fizikë, kimi, biologji dhe gjeografi. Në mënyrë që të sigurohet që objekti i ri t’i përmbushë nevojat e arsimit modern dhe punës hulumtuese, përveç financimit të BE-së janë edhe 5 milionë euro shtesë për inventar dhe pajisje laboratorike të ndara nga Universiteti i Prishtinës.