Lajme

Sveçla: 26 korriku të shpallet datë përkujtimore për policët e rënë në detyrë

Autori: Gazeta inFokus 18:52 | 27 July 2021

Ministri i Punëve të Brendshme, Xhelal Sveçla, ka thënë se duke nderuar policët e rënë në detyrë, nderojnë vetëveten.

Ai shkroi në Facebook se 21 policët kanë rënë për të mbrojtur shtetin, dinjitetin dhe vlerat demokratike të shoqërisë.

“Pllaka që u zbulua nga Kryetari i Kuvendit, Kryeministri dhe Drejtori i Policisë me 21 emrat e heronjve tanë të gdhendur në të, do të qëndrojë përgjithmonë aty, në oborrin e institucioneve tona”, shkroi ai pas përurimit të pllakës përkujtimore.

Sveçla tregoi se ka bërë kërkesë tek kryeministri Kurti që data 26 korrik të shpallet edhe me ligj të Republikës së Kosovës si datë përkujtimore për policët e rënë në kryerjen e detyrës.

“Ne e kemi obligim institucional e moral, shoqëror e shtetëror, individual e kolektiv, që t’i nderojmë policët e rënë me konsideratat më të larta shtetërore. Vetëm duke i nderuar ata, ne nderojmë vetveten”.

“Unë, si Ministër do të angazhohem më të gjitha kapacitete e mia, që Policia e Kosovës të jetë edhe më profesionale, me integritet të lartë dhe gjithmonë në shërbim të qytetarëve, e krahasuar me vendet e botës demokratike”.

Të tjera