Lajme

Sulmohet imami i xhamisë në Podujevë, arrestohen tre të dyshuar

Autori: Gazeta inFokus 10:20 | 22 July 2022

Imami i xhamisë në fshatin Lupç të Podujevës, Zeqir Berisha dyshohet se është sulmuar fizikisht mbrëmjen e së enjtes, shkruan Gazeta Infokus.

Lajmin për Infokus e ka konfirmuar zëdhënësja e policisë për rajonin e Prishtinës, Flora Ahmeti, e cila ka bërë të ditur se imami i xhamisë pas lëndimeve të marra ka pranuar tretman mjeësor.

“Mbrëmë rreth orës 22:00, policia ka marrë informacionin se në fshatin Lupç i poshtëm të Podujevës, është gjetë një person i lënduar rëndë. Personi i lënduar Z.B. mashkull, është dërguar për tretman mjekësor, ndërkohë që njësitet policore të Podujevës menjëherë kanë filluar ndërmarrjen e verimeve operativo-hetimore dhe kanë arritë të arrestojnë tre persona të dyshuar”, ka thënë Ahmeti.

Gjithashtu, ajo ka konfirmuar se lidhur me rastin janë arrestuar edhe tre të dyshuar, ku me urdhër të prokurorit janë dërguar në qendrën e mbajtjes.

Derisa ndaj tyre është iniciuar rasti vrasje në tentativë.

“Personat e arrestuar: B.M, mashkull 27 vjeç A.M, mashkull 28 vjeç dhe Sh.M mashkull 25 vjeç. Pas intervistimit, me urdhër të prokurorit të shtetit janë dërguar në qendrën e mbajtjes, ndaj tyre është iniciuar rasti vrasje në tentativë”, ka thënë Ahmeti./Gazeta Infokus/

Të tjera