Viti 2017 ka qenë një vit i brishtë sa i përket njohjeve ndërkombëtare të Pavarësisë së Kosovës. Bangladeshi dhe Madagaskari janë dy shtetet e vetme të cilat kanë njohur Kosovën gjatë kësaj periudhe.

Përveç kësaj, ky vit është karakterizuar edhe me një propagandë të madhe të Serbisë kundër njohjeve të Kosovës.

Përveç faktit se Serbia po lobon kundër njohjeve të shtetit tonë, gjatë kësaj periudhe kohore ata disa herë kanë përhapur lajmin se disa nga shtetet ndërkombëtare kanë tërhequr njohjen.

-Advertisement-

Megjithatë një gjë të tillë e ka kundërshtuar zëvendëskryeministri i Kosovës, njëherësh ministri i Punëve të Jashtme, Behgjet Pacolli, i cili madje i ka quajtur si qesharake këto deklarata të udhëheqësve serb.

Për këtë, Pacolli ka premtuar se shumë shpejt edhe do ketë njohje të reja për vendin.

Ndryshe, i gjithë procesi i njohjeve po konsiderohet si një stagnim i madh.

Njohësit e çështjeve politike vlerësojnë se në ngecjen e njohjeve kanë reflektuar zhvillimet e brendshme politike por edhe ato të jashtme.

Sipas, Azem Vllasit tek kjo gjë po ndikon edhe fushata e vazhdueshme armiqësore e Serbisë kundër njohjes së Kosovës.

Për këtë, ai thotë se gjatë dialogut në Bruksel duhet bërë presion edhe nga Unioni Evropian që të ndërpritet një fushatë e tillë.

“Mjerisht, njohjet janë ngadalësuar. Shteti i Serbisë akoma është duke vazhduar një fushatë armiqësore kundër njohjes së Kosovës dhe mendoj se kryesorja do të ishte që gjatë dialogut në Bruksel të bëhet presion edhe nga Unioni Evropian, para së gjithash të insistohet nga pala kosovare që Serbia të ndërpret një fushatë të tillë, sepse kjo manifeston një akt armiqësor dhe qëndrimin e Serbisë kundër normalizimit të marrëdhënieve të Kosovës dhe Serbisë si dy shtete”, ka deklaruar Vllasi.

Ndërsa, njohësi i çështjeve ndërkombëtare, Afrim Hoti ka thënë se mungesa e konsolidimit institucional dhe krizat e vazhdueshme politike, kanë sjellë një rezultat negative për njohjet.

“Mendoj se procesi i njohjeve këto 2-3 vitet e fundit është përshkruar nga një stagnacion i madh dhe në të shumtën e rasteve kanë reflektuar zhvillimet e brishta të brendshme politike. Me fjalë të tjera, për shkak të mungesës së konsolidimit institucional dhe krizave të vazhdueshme politike, çështja e njohjeve nuk është trajtuar me prioritet dhe për më shumë është trajtuar fare”, ka deklaruar Hoti.

Sipas tij, shteti i Kosovës duhet të jetë sa më aktiv sa i përket kësaj çështjeje.

“Kjo zaten ka sjell edhe këtë rezultat kaq negative në formën që vitit të përmbyllet me vetëm dy njohje. Arsyet, është e kuptueshme që janë edhe të jashtme porse të paktën do duhej që ne të ishim dhe të jemi më aktiv, më syçelë dhe më të përgjegjshëm për këtë tematikë të ndjeshme për vendin tone”, ka shtuar ai më tej.

Ndryshe, Bangladeshi ka njohur Kosovën më 27 shkurt të vitit 2017, ndërsa Madagaskari më 25 nëntor.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-