Pas protestës të mbajtur të enjten para Ministrisë së Shëndetësisë, specializantët e Shërbimit Spitalor, Klinik dhe Universitar të Kosovës kanë paralajmëruar sërish protesta nëse kërkesat e tyre nuk merren parasysh nga kjo ministri, shkruan Gazeta Infokus.

Kryetari i Këshillit të Specializantëve, Arianit Zajmi, në një përgjigje për Gazetën Infokus ka treguar për pakënaqësitë e tyre.

Ai është shprehur i shqetësuar, duke thënë se janë rreth 600 specializantë me subvencione që ende nuk kanë hyrë si të rregullt.

Gjithashtu Zajmi tha se këta specializantë kanë shumë probleme me pagat e tyre të cilat u vonohen.

“Çdo tre muaj detyrohen me dërgu raportin e trustit në ministri që me tregu se nuk kanë të hyra tjera në të kundërtën ju ndalet paga”, ka thënë kryetari i Këshillit të Specializantëve.

Gjithashtu, Arianit Zajmi shprehu edhe shqetësimin tjetër, i cili ka të bëj me mos pagesën e më shumë se dy kujdestarive, duke kërkuar që çdo kujdestari e mbajtur të paguhet.

“Domethënë ka specializantë qe i mbajnë nga pesë kujdestari 24 orëshe, e prej tyre ju paguhen vetëm dy ose ndodh edhe hiç. Ne po kërkojmë që çdo kujdestari që e mbajmë të na paguhet”, deklaroi ai.

Kryetari i Këshillit të Specializantëve po ashtu foli edhe për problemin e nëntë specializantët nga Shqipëria, Mali i zi e Maqedonia, të cilët ende nuk kanë marrë as edhe një pagë.

Madje tha se njëra prej tyre është detyruar që ta ndërpres specializimin, pasi që nuk mund t’i përballojë shpenzimet.

Zajmi theksoi për Gazetën Infokus se kanë kërkuar takim me ministrin e Shëndetësisë, Rifat Latifi, por ky i fundit nuk e ka pranuar një gjë të tillë.

Kurse, për takimin e parë që e kanë pasur me ministrin, ai potencoi se nuk ka pasur asgjë konkrete përveç premtimeve.

“Ne ja kemi dërguar ftesën për takim të dytë me ministrin dhe e kemi pritur deri më 21 janar, nuk na ka pranuar, prandaj kemi vendosur me ju rikthy protestave. Takimin e parë e kemi pasur nga fundi i dhjetorit të 2021 dhe përveç premtimeve nuk ka pasur diçka konkrete”, shtoi tutje Zajmi.

E lidhur me këto pakënaqësi të specializantëve, Gazeta Infokus ka kontaktuar edhe Ministrinë e Shëndetësisë, por deri në momentin e publikimi të artikullit, nga ky dikaster nuk kanë kthyer përgjigje.

Specializantët e Shërbimit Spitalor Klinik Universitar të Kosovës kanë protestuar edhe më herët para Ministrisë së Shëndetësisë, pasi kërkesa e tyre që t’u paguhen orët e kujdestarive është refuzuar nga Komisioni për Buxhet dhe Financa./Gazeta Infokus/