Lajme

Sot u varros në moshën 87-vjeçare, Nefise Sfarça – Bashkëveprimtarja e Adem Demaçit

Autori: Gazeta inFokus 17:42 | 26 January 2025

Nefise Sfarça, një nga veprimtaret më të njohura dhe të përkushtuara të Lëvizjes Kombëtare Shqiptare, ka ndërruar jetë në moshën 87 vjeçare, duke lënë pas një trashëgimi të jashtëzakonshme.

E lindur në Sukth të Shqipërisë në vitin 1938, ajo dhe familja e saj u detyruan të largohem nga shtëpia për shkak të regjimit komunist të Enver Hoxhës, duke u shpërngulur në Kosovën e okupuar nga Jugosllavia.

Miftar Sfarça, vëllai i Nefise Sfarçës, ishte gjithashtu një veprimtar i përkushtuar i çështjes kombëtare shqiptare.

-Advertisement-

Pjesën më të madhe të jetës së tij e kaloi në Shqipëri, por, kur shpërtheu lufta në Kosovë, ai iu bashkua UÇK-së dhe mori pjesë aktivisht në Luftën e Koshares. Pas luftës, Miftari u kthye në Shqipëri, por vazhdoi të vizitonte shpesh Kosovën deri në vdekjen e tij në vitin 2021. Angazhimi i tij për liri dhe drejtësi për popullin shqiptar ka lënë një ndikim të thellë dhe të paharruar.

Nefise Sfarça ishte një bashkëpunëtore e ngushtë e Adem Demaçit dhe e angazhuar fuqishëm në lëvizjen për të drejtat e shqiptarëve.

Ajo u lidh ngushtë me shumë figura të njohura të asaj periudhe si Shaban Shala dhe familja Novosella, dhe ishte e përfshirë aktivisht në mbrojtjen e çështjes kombëtare shqiptare.

Sfarça shkruante slogane për lëvizjen gjatë viteve ’60-’70, pavarësisht rrezikut nga regjimi jugosllav, dhe shpesh herë arrestohej për aktivitetet e saj patriotike.

Në vitin 1963, ajo vizitoi varrin e Shaban Shalës, ku vendosi flamurin kombëtar shqiptar si simbol të angazhimit të saj të palëkundur. Ky flamur, i qendisur nga ajo vetë, ishte 2 metra i gjatë dhe tregonte dëshirën e fortë për liri. “Deshira për liri ka rrënjë të thella,” thoshte Nefise, duke përçuar mesazhin e saj të fuqishëm për të gjitha brezat e rinj.

Pavarësisht sfidave dhe periudhave të vështira, ajo qëndroi e palëkundur dhe e përkushtuar për kauzën e saj.

Ajo nuk kërkoi kurrë mbështetje pas Çlirimit të Kosovës dhe mbeti një figurë e njohur dhe e respektuar nga ata që e njihnin për idealet dhe përkushtimin e saj. Nefise ishte një patriote e vërtetë, dhe në dhomën e saj mbante korniza me fotografitë e Isa Boletinit, Ismail Qemalit dhe flamurit shqiptar, duke nderuar ata që luftuan për lirinë dhe pavarësinë e kombit shqiptar.

Subscribe në YouTube: GAZETA INFOKUSI
FIFA Club World Cup ekskluzivisht vjen për herë të parë në Artmotion
-Advertisement-

Të tjera

Fokusi

lajme