Lajme

S’ka ende buxhet për zgjedhjet e tetorit

Autori: Gazeta inFokus 08:21 | 30 August 2017

Qeveria e Kosovës ende nuk i ka ndarë mjetet buxhetore për organizimin e zgjedhjeve lokale në vend, derisa periudha në dispozicion kur qytetarët do t’i drejtohen kutive të votimit është më pak se dymujore, shkruan sot, gazeta Zeri.

Me buxhetin e vitit 2017 ishin planifikuar mbi 5 milionë euro për mbajtjen e zgjedhjeve komunale në vend, por këto mjete ishin marrë në shfrytëzim nga autoritetet vendore për t’i organizuar zgjedhjet e parakohshme parlamentare, të mbajtura në qershor të këtij viti.

Megjithëse po bëhen tre muaj prejse janë mbajtur zgjedhjet parlamentare, ekzekutivi i vendit ende nuk e ka ndarë buxhetin e nevojshëm për organizimin e zgjedhjeve komunale, të cilat do të mbahen më 22 tetor të këtij viti.

-Advertisement-

Zëdhënësi i Komisionit Qendror të Zgjedhjeve (KQZ), Valmir Elezi, ka deklaruar se janë duke e përgatitur një raport përfundimtar për koston e organizimit të zgjedhjeve të parakohshme parlamentare. Sipas tij, meqenëse zgjedhjet parlamentare nuk kanë qenë të planifikuara me buxhet, atëherë janë shfrytëzuar mjetet e ndara për zgjedhjet komunale të këtij viti.

“Qeveria e Kosovës ka vendosur se do të ndahen mjetet buxhetore për zgjedhjet komunale gjatë procesit buxhetor 2017”, ka pohuar Elezi.

Sipas tij, për zgjedhjet lokale 2017 nga Ligji për Buxhet i këtij viti, i miratuar në Kuvendin e Kosovës, janë paraparë 6.1 milionë euro.

Megjithatë, siç thotë ai, shuma e saktë e buxhetit të nevojshëm për zgjedhjet komunale nuk dihet pa përfunduar i gjithë procesi, pasi kjo gjë varet edhe nga komunat që do të shkojnë në balotazh.

“Kostoja e zgjedhjeve lokale varet edhe në atë se në sa komuna do ta kemi rundin e dytë, pra i balotazhit, i cili është paraparë me ligj. Vlen të theksohet se në zgjedhjet lokale të vitit 2013 janë mbajtur rundet e dyta në 25 komuna nga 38 sa janë gjithsej”, ka sqaruar Elezi.

Në anën tjetër, zyrtarë të Ministrisë së Financave kanë deklaruar për gazetën “Zëri” se rreth 2 milionë euro të ndara fillimisht për zgjedhjet komunale, të cilat janë shfrytëzuar për organizimin e zgjedhjeve të parakohshme parlamentare, do të kompensohen për Komisionin Qendror të Zgjedhjeve gjatë procesit buxhetor të vitit 2017.

Subscribe në YouTube: GAZETA INFOKUSI