Që pas humbjes së kontrollit të Kosovës, qeveritë e Serbisë kanë pasur nga një organ që është marrë me Kosovën.

Në fillim të viteve 2000, në Beograd kishte funksionuar Qendra Koordinuese për Kosovën, e cila ishte shuar më 2008 për t’u themeluar e ashtuquajtura “Ministri për Kosovë dhe Metohi”.

Në vitin 2012 ishte shuar edhe ministria për t’u krijuar e ashtuquajtura “Zyra për Kosovë e Metohi”, në kuadër të Qeverisë së Serbisë. Aktualisht atë e udhëheq Petar Petkoviq, i cili e ka zëvendësuar Marko Gjuriqin që Vuçiq e çoi si ambasador në Uashington.

Petkoviq është edhe kryenegociator i palës serbe në dialogun e Brukselit, ndërsa në krye të kësaj zyre ai merret me gjithçka që lidhet me Kosovën dhe serbët që jetojnë këtu.

Kryesisht, Petkoviq “peshkon” incidentet që ndodhin ndërmjet shqiptarëve dhe serbëve duke i paraqitur sa më shumë si probleme ndëretnike. Kjo zyrë që kontrollohet direkt nga Vuçiq ushtron ndikim direkt te Lista Srpska që është pjesë e Qeverisë.

Kosova deri më tash nuk ka pasur një zyrë që merret me problemet e shqiptarëve të tre komunave të Preshevës, Medvegjës e Bujanocit. Udhëheqësit në Prishtinë nuk kanë pasur kontakte të rregullta me lidershipin shqiptar atje. Të hënën mbrëma Kurti bëri me dije se planifikon të themelojë Zyrë në kuadër të Kryeministrisë për tre komunat atje.

Kryeministri i Republikës së Kosovës, Albin Kurti, e ka emëruar Ardita Sinani, Këshilltare Politike për Preshevë, Medvegjë dhe Bujanoc.

“Ky është hapi i parë drejt themelimit të Zyrës për Preshevë, Medvegjë dhe Bujanoc, në kuadër të Zyrës së Kryeministrit, zyrë të cilën do ta koordinoj znj.Sinani. Kjo zyrë do të jetë në funksion të përmirësimit të gjendjes së shqiptarëve në këto komuna, ruajtjen e marrëdhënieve të mira dhe shtimin e bashkëpunimit institucional për mbrojtjen dhe avancimin e të drejtave të tyre, si nevojë dhe domosdoshmëri e kohës” thuhet në njoftimin e ZKM’së.

Shqiptarët atje, vazhdimisht kanë kërkuar të drejta në nivel me serbët që i kanë në Kosovë. Mbetët të shihet se cili do të jetë roli i kësaj zyre, nëse Kurti do ta përdorë si “reciprocitet” me Serbinë apo do të jetë vërtete një mekanizëm që u ndihmon shqiptarëve të Luginës.

Vlen të përmendet se me Kryetarin e Komunës së Preshevës, Shqipërim Arifi kreu i Qeverisë Kurti ka raporte të këqija. Gjatë vizitës atje, delegacioni i kryesuar nga Besnik Bislimi nuk e takoi fare Arifin.

Intervistë: Dr. Gorazd Konjanovski – Klinika Zhan Mitrev ka luajtur një rol kyç në vendosjen e themeleve në kardiokirurgji dhe…

Sponsoruar