Lajme

Si do të funksionojë Byroja e Kurtit dhe kë do ta ndjekë, zyrtari i MD-së jep shpjegimin

Autori: Gazeta inFokus 18:20 | 19 July 2022

Shefi i kabinetit në Ministrinë e Drejtësisë, Genc Nimoni, ka qenë i ftuar në emisionin “Frontal” të T7, ku ka folur për Byronë Shtetërore për Verifikimin dhe Konfiskimin e Pasurisë së Pajustifikueshme.

Nimoni tregoi se kjo byro është institucion i pavarur që do të jetë kompetente vetëm për inicimin e rastit, i cili do të shkojë në gjykatë dhe më pas Gjykata vendos nëse kjo pasuri nuk mund të justifikohet, shkruan Express.

Ai tha pasuri e pajustifikueshme është kur dyshohet që ajo pasuri është krijuar pa bazë ose në bazë të kundërligjshme.

“Kjo byro është për persona publikë, për persona të tretë që i kanë ndërlidhshmëritë me personat publikë, të gjithë ata që mbi këtë bazë të korrupsionit, kundër ligjshmërisë, kanë krijuar këtë pasuri e cila ka qenë një formë e korrupsionit dhe keqmenaxhimit me paranë publike”, tha Nimoni në “Frontal”.

Ai tha se nëse dikush ka informacione për dikë se ka pasuri të pajustifikueshme, duhet ta dërgojë një ankesë.

“Në byro janë disa kritere dhe në bazë të tyre e shohin nëse ka bazë. Në qoftë se ka bazë, hartohet një kërkesë fillestare për verifikim. Një bazë është mospërputhja e deklarimit të pasurisë, pastaj përpilohet kjo në bazën e dëshmive të ofruara dhe zyrtarët kanë të drejtë të kërkojnë informacione shtesë nga institucionet. Ndërsa subjekti ka të drejtë të njoftohet, e çon dokumentacionin, pastaj ka të drejtë të përgjigjet në atë ankesë. Pas këtyre, kur të ndërtohet lënda, mbi këtë bazë, shkon tutje në gjykatë”, tha Nimoni.

Të tjera

Fokusi

lajme