Dy muaj pas zgjedhjeve parlamentare, Kosova nuk ka ende qeverinë e saj. Në një analizë të gazetës zvicerane “Neue Zürcher Zeitung” (14.08) vërehet se ka dështuar disa herë konstituimi i parlamentit të ri. “Situata e ‘patt-it” në Kosovë nuk do të thotë, se në Kosovë është pezulluar jeta dhe se publiku i ndjek duke u dridhur zhvillimet në parlament në Prishtinë. Sezoni i verës sjell si çdo vit dhjetëra-mijëra kosovarë në vendlindje, që vizitojnë të afërmit ose shkojnë për pushime në bregdetin shqiptar….e për Kosovën vizitorë të tillë janë të rëndësishëm, sepse me shpenzimet e tyre ata i japin jetë turizmit dhe gastronomisë…por megjithëse jeta vazhdon, bllokada politike i kushton shumë financiarisht Kosovës.”
Duhet qeveri me mbështetje të gjerë
“Neue Zürcher Zeitung” i referohet një shifre të përmendur nga afaristi i njohur Bexhet Pacolli, sipas të cilit Kosova ka humbur 138 milionë dollarë nga fondet monetar, kjo për shkak se nuk funksionojnë institucionet. “Jo vetëm kampet politike janë tejet të armiqësuara, krahas problemeve ekonomike kronike dhe vështirësive sociale, janë për t’u zgjidhur çështje delikate të politikës rajonale, të cilave mund t’u japë zgjidhje vetëm një qeveri me mbështetje të gjerë.”
NZZ i kushton vëmendje edhe dialogut me Serbinë dhe zgjidhjes së çështjes së asociacinit të komunave serbe duke theksuar se këtu Kosova ka nevojë për një diskutim të brendshëm. “Duhet që të ecë përpara kompensimi ndërmjet Beogradit e Prishtinës, më së miri të bëhet hap cilësor, në rast të tillë Kosova ka nevojë për një qeveri të fortë. Nëse zgjedhjet e reja do ta përmirësojnë gjendjen, kjo nuk dihet.”
Ndërsa gazeta gjermane “Frankfurter Allgemeine Zeitung” nën titullin “Xhihad vajtje ardhje” (14.08) i kushton vëmendje frikës nga kthimi i luftëtarëve që kanë shkuar të luftojnë për të ashtuquajturin “Shteti Islamik” në vendet e Ballkanit. Prej vitesh shtohen në Ballkan tendencat që e bëjnë të dukshëm kthimin e islamit tradicional, shkruan FAZ. Një shenjë për këtë janë xhamitë jashtë ndikimit të bashkësisë fetare mylsimane, ku predikohet një islam radikal.
“Disa nga këto shërbejnë edhe si qendra rekrutimi për luftëtarët e IS-it dhe femrat, nuset e luftëtarëve që i bashkohen ‘Shtetit Islamik’….kjo nuk shqetëson vetëm vendet ballkanike. Kur vetë vendet perëndimore me institucione efektive zor se e dinë se çfarë ndodh në xhamitë e tyre, atëherë kjo vlen më shumë për vendet e Ballkanit me administratë të dobët.”
Po pas burgut ç’ndodh me xhihadistët?
Shqetësim ka ngritur edhe një artikull plot urrejtje i botuar në numrin e korrimut të revistës “Rumiyah” të IS-it, botimi në gjuhën boshnjake. Aty bëhet thirrje për të vrarë myslimanët e moderuar dhe myftinjtë e tillë para grave dhe fëmijëve të tyre. FAZ citon artikullin ku thuhet “se ne betohemi tek allahu, se allahu nuk vlerëson gjë tjetër më shumë, se të vrasësh ata që e kanë deformuar besimin e tij dhe duan ta shkatërrojnë nga brenda islamin.”
Paralajmërime të tilla shqetësojnë autoritetet edhe sepse një pjesë e xhihadistëve është kthyer në vendet e Ballkanit, shkruan FAZ. “Proceset gjyqësore në Kosovë, Serbi, Bosnje kanë përfunduar vërtet me dënime të larta. Por ekspertët e sigurisë vërejnë se nuk është bërë asgjë për të penguar radikalizimet e të burgosurve të tjerë. Po ashtu nuk ka asnjë koncept për një mbikqyrje të efektshme të terroristëve të liruar nga burgu apo programe risocializimi.”/DW
