Lajme

Shtyhet afati për aplikim për subvencione

Autori: Gazeta inFokus 15:31 | 05 Tetor 2021

Afati për aplikim për pagesa direkte-subvencione për vitin 2021. Ministria e Bujqësisë Pylltarisë dhe Zhvillimit Rural ka marrë vendim që afati për subvencione të shtyhet deri më 11 tetor.

Për vendimin e ministrit Faton Peci, kanë njoftuar ministria e Bujqësisë, Pylltarisë dhe Zhvillimit Rural nëpërmjet një komunikate për medie.

“Ministri i Bujqësisë, Pylltarisë dhe Zhvillimit Rural, Faton Peci ka marrë vendim për zgjatjen e afatit për aplikim për pagesa direkte – subvencione për vitin 2021 deri më 11 tetor 2021 ora 16:00. Ky vendim është marrë duke pasur parasysh interesimin e madh të fermerëve për të aplikuar në kuadër të Programit për Pagesa Direkte 2021, si dhe kërkesave të tyre dhe të Drejtorive Komunale për Bujqësi për zgjatjen e këtij afati edhe pas datës 05 tetor 2021. Përmes këtij vendimi po iu mundësohet aplikimi të gjithë fermerëve, që kanë mbetur pa aplikuar deri më tani në kuadër të Programit për Pagesa Direkte 2021″, thuhet në komunikatë.

-Advertisement-

Ndërkaq, procedurat e aplikimit dhe dokumentacioni mbetet i njëjtë dhe të gjithë të interesuarit informatat e hollësishme mund t’i gjejnë në web faqen e MBPZHR-së, www.mbpzhr-ks.net dhe në web faqen e AZHB-së, www.azhb-ks.net, si dhe në Drejtoritë Komunale për Bujqësi.