Kudo në botë shqiptarët e suksesshëm nuk mungojnë. I tillë është edhe Ahmet Gjanaj, me origjinë nga Kukësi, por i lindur dhe i rritur në Bruksel. Ai është deputet në Parlamentin e Brukselit dhe njëherësh aktivist i madh i komunitetit shqiptar në Belgjikë.

Ai në emisionin “Mirëmëngjesi Kosovë” në RTK 1, ka folur për aktivitetin e tij si deputet në parlamentin e Brukselit, por edhe për aktivitetet e shqiptarëve në Belgjikë.

Ndonëse i lindur e i rritur në Belgjikë, Gjanaj ka arritur të ruajë plotësisht gjuhën dhe kulturën shqipe. “Nëse flas shqip merita është pa dyshim e prindërve. Tash ngelet të shihet nëse edhe unë do të arrij t’ua transferojë fëmijëve të mi këtë. Në familje e kemi si përparësi që të flasim shqip, sepse është pjesë e identitetit tonë. Nuk e konceptoj të jetoj pa ua mësuar gjuhën shqipe dhe t’ua transmetoj kulturën shqipe fëmijëve të mi. Të gjithë shqiptarët në Belgjikë kemi arritur të kultivojmë ruajtjen e gjuhës dhe të kulturës shqipe. Ne si komunitet kemi arritur që në Bruksel të krijojmë shkollën shqipe dhe të hapim edhe një grup të valleve. Kurse së shpejti do të inaugurojmë edhe qendrën kulturore”, ka theksuar Gjanaj.

Ai ka thënë se tashmë është krijuar një model i besueshëm tek komuniteti, edhe pse edhe në të kaluarën nuk kanë munguar iniciativat.

“Tani kemi 13 vite që kemi hapur shkollën shqipe në njërën nga komunat e Brukselit dhe kemi krijuar një model suksesi. Tani janë 3-4 shkolla që janë funksionale të bazuara në modelin tonë. Po ashtu kemi edhe grupin e valleve dhe një qendër kulturore. Po ashtu së shpejti do të kemi edhe një lokal ku do të jetë për komunitetin shqiptar. Ka interesim për mësim plotësues në gjuhën shqipe nga komuniteti, por realisht nuk është në masën që ne do të dëshironim. Ne rregullisht çdo vit kemi nga 80 fëmijë në shkollë, por vështirësitë janë të shumta. Gjithçka funksionon me forcat në shkollën shqipe. Shteti belg ka interes që komunitetet të mësojnë gjuhët e vendit, nuk e mbështet drejtpërdrejt shkollën shqipe. Duhet kaluar përmes shumë mekanizmave për të arritur ta mbështesë sadopak shkollën shqipe. Por ne nuk kemi mbështetje sa duhet as nga shtetet tona të origjinës, Shqipëria e Kosova. Patriotët më të mëdhenj i kemi pikërisht në shkollën shqipe, sepse mësuesit bëjnë një punë të jashtëzakonshme në mënyrë vullnetare”, është shprehur Gjanaj.

Ai ka folur edhe për aktivitetin e tij në Parlamentin e Brukselit, si pjesë e Partisë Socialiste të Belgjikës. “Unë përfaqësoj 1,2 milionë banorët e Brukselit, që është një prej tri etniteteve që përbëjnë shtetin federal të Belgjikës. Shumica e votave që kam marrë kuptohet janë nga shqiptarët, sepse më kanë parë aktiv në aktivitete të ndryshme. Në Bruksel janë 20 mijë shqiptarë, kurse në tërë Belgjikën diku rreth 60 mijë”, ka shtuar Gjanaj.