Sekretari i Partisë Nisma për Kosovën, Bilall Sherfi, ka  shkruar për ngjarjen qe ndodhi dy ditë më parë në Maqedoni, duke thënë se deputetët janë dërguar aty si gladiator për të luftuar për jetën e tyre duarthatë dhe jo si përfaqësues të popullit.

Lexoni më poshtë postimin e tij të plotë:

Ngjarja që u zhvillua natën e së enjtes së 27 prillit në Kuvendin e Maqedonisë nuk ishte thjesht një shpërthim i pa kontrolluar i një grumbulli shovinistësh maqedonas të cilët vendimin për të hyrë në Kuvend dhe për të sulmuar të gjithë deputetët që kishin votuar për kryetar të Kuvendit deputetin shqiptar Talat Xhaferrin e morën aty për aty.

-Advertisement-

Sulmi mbi deputetët rezultoi me dhjetëra deputet të lënduar rëndë, prej të cilëve më së rëndi e pësoi deputeti shqiptar dhe kryetari i LR PDSH-së, Ziadin Sela. Dëshmitarët dhe video incizimet nga vendi i ngjarjes konfirmojnë se sulmi mbi Kuvendin e Maqedonisë dhe deputetëve të shumicës parlamentare ishte e organizuar dhe e orkestruar nga Nikolla Gruevski, ndërsa zbatimin e këtij plani ia kishte besuar fallangave përmes të cilëve ai kontrollon policinë e shtetit.

Për të “fshehur” implikimin e drejtpërdrejtë në këtë grusht-shtet të llojit të vet, Nikolla Gruevski nuk ishte prezent në Kuvendin e Maqedonisë. Ai u ndodh jashtë shtetit për të siguruar “alibinë e përsosur”! Por, a mund t’i shërbejë si alibi kjo teknikë tashmë e njohur mbetet të shihet. Por ajo që është për keqardhje në këtë situatë lidhet me talljet që po dëgjohen për “guximin” apo “mos guximin” e konfrontimit të deputetëve me fallangat e Nikolla Gruevskit.

Thuajse deputetët janë dërguar aty si GLADIATOR për të luftuar duarthatë për jetën e tyre jo si përfaqësues të popullit për të mbrojtur interesat e tij politikisht! Edhe më e neveritshme bëhet kur këto tallje vijnë jo nga vendi i ngjarjes (“Arena e Glladiatorëve”) por, përmes Smartfonëve nga qindra kilometra larg. Në këtë kontekst më duket tejet domethënës një thënie e Alebrt Ajnshtainit, sipas të cilit “Të bësh përherë të njëjtën gjë dhe të presësh rezultate të ndryshme është marrëzi e kulluar”!

Ndryshimi i kësaj gjendje në Maqedoni kërkon para së gjithash një koordinim të veprimeve ndryshe nga e kaluara ku përgjegjësia e secilit matet me pozitën që ka në strukturat shoqërore apo institucionet shtetërore. Vetëm koordinimi i përgjegjshëm në këtë situatë mund të sigurojë që “luanët e Projektit Skopje 2014” të përfundojnë në Kopshtin Zoologjik të historisë!/Indeksonline

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-