Lajme

SHBA: Rusia po blen artileri nga Koreja e Veriut në vlerë prej miliarda dollarësh

Autori: Gazeta inFokus 11:27 | 06 September 2022

Një vlerësim i publikuar i inteligjencës amerikane thotë se Rusia po blen raketa dhe artileri nga Koreja e Veriut në vlerë prej miliarda dollarësh.

Sipas inteligjencës amerikane, këto armatime po blihen për pushtimin e Ukrainës, që tashmë është në muajin e shtatë, dhe sipas SHBA-së ky është një tregues për efektin që po kanë sanksionet perëndimore ndaj përpjekjeve të Rusisë për luftë.

Gazeta New York Times publikoi gjetjet, por tha se specifikat e këtyre blerjeve, përfshirë edhe llojet dhe koha kur janë blerë armatimet, janë ende të paqarta.

-Advertisement-

Gazeta ka cituar një zyrtar të paidentifikuar amerikan i cili ka thënë se blerje të tilla pritet të vazhdojnë dhe ndoshta të zgjerohen përtej raketave me rreze të mesme veprimi dhe municioneve.

Publikimi i këtij vlerësimi pason raportimet muajin e kaluar, që thirreshin në burime të SHBA-së të cilat thoshin se ka pasur probleme mekanike apo teknike në mesin e dy llojeve të dronëve ushtarakë që Rusia së fundmi kishte marrë nga aleati i saj, Irani.

Presidenti rus, Vladimir Putin, dhe shefat e inteligjencës e komandantët rusë besohet se kanë menduar se qëllimet kryesore të pushtimit të shkallës së gjerë – pas tetë vjetësh luftë në lindje të Ukrainës – do të arriheshin brenda ditësh, kur Putin urdhëroi nisjen e pushtimit në fund të shkurtit.

Por, ukrainasit u kundërpërgjigjën me një rezistencë të fortë, teksa po ndihmohen me dërgesa të armëve nga Perëndimi. Së fundmi, Kievi ka nisur një kundërofensivë për të rimarrë kontrollin e pjesës jugore të vendit.

Të dyja palët nuk tregojnë për shifrat e ushtarëve të vrarë, por ka një konsensus se si Kievi ashtu edhe Moska kanë pësuar humbje të mëdha të ushtarëve, dhe në rastin e Ukrainës, edhe të viktimave civile.

Kievi dhe Moska janë zotuar se do të luftojnë deri sa të arrijnë fitore.

Qeveritë perëndimore dhe anëtarët e NATO-s kanë dërguar armë dhe pajisje të tjera ushtarake në Ukrainë në vlerë prej miliarda dollarësh, teksa Kievi po vazhdon luftën kundër pushtimit rus.

Subscribe në YouTube: GAZETA INFOKUSI