Rozë

SHBA, aktorja e njohur nën akuzë për ngacmim seksual

Autori: Gazeta inFokus 10:18 | 20 Gusht 2018

Asia Argento ka paguar plotë 380 mijë dollarë ndaj aktorit amerikan Jimmy Bennett, i cili pretendon se është ngacmuar seksualisht nga ana e aktores italiane në vitin 2013, kur ai ishte vetëm 17 vjeç.

Mediat amerikane shkruajnë se sipas Bennet, abuzimi ka ndodhur në një dhomë hoteli në California, SHBA.

Ajo dhe i riu interpretonin në një film, ku Argento luante rolin e nënës prostitutë të aktorit të ri.

-Advertisement-

Sipas avokatëve të Bennett, bëhet fjalë për një abuzim seksual që e ka terrorizuar të riun, duke rrezikuar seriozisht shëndetin e tij mendor.

Në denoncimin e tyre, avokatët kërkuan një dëmshpërblim prej 3.5 milionë dollarësh, për dëmtim të sferës emocionale dhe humbjes së roleve pas abuzimit të pësuar.

‘New York Times’ shkruan se ka marrë dokumete përfshi dhe një fotografi selfie të dy aktorëve në shtrat. Ndërkohë pas negociatave marrëveshja u përmbyll pak kohë më parë, ku Asia u detyrua të paguajë 380 mijë dollarë.

Sipas gazetës amerikane, marrëveshja është përmbyllur në prillin e shkuar. Tre persona që kanë dijeni mbi çështjen, kanë pohuar se dokumentet janë autentikë, pohon gazeta.