Lajme

Shala për refuzimin e projektit të gazit: Projektet e rëndësisë strategjike nuk maten me kosto financiare

Autori: Gazeta inFokus 11:02 | 08 October 2021

Nënkryetari i LDK-së, Kujtim Shala ka folur për refuzimin që Qeveria e Kosovës i ka bërë projektit të gazit i sponsorizuar nga MCC amerikane.

Ai tha se projekti është i natyrës strategjike dhe sipas tij Kosova nuk do të ishte dashur të fokusohej në aspektin teknik.

“Një projekt i tillë i rëndësisë strategjike nuk mund të matet me koston e tij. Vendet që kanë qëllime strategjike nuk masin kosto të tilla. Ne mendojmë që ajo që bëri Qeveria është gabim i madh. Çështja është se cilat do të jenë pasojat tjera në raport me Amerikën”, tha ai.

Ministrja e Ekonomisë, Artane Rizvanolli, lidhur me tërheqjen e Kosovës nga projekti për ndërtimin e infrastrukturës së gazit të financuar nga Korporata e Sfidave të Mijëvjeçarit e Qeverisë së Shteteve të Bashkuara të Amerikës (MCC) ka thënë se kosto e këtij projekti do të kishte qenë e lartë dhe se Qeveria nuk ka pasur vlerësim të saktë.

Nënkryetari i LDK-së, Kujtim Shala ka folur edhe për zgjedhjet lokale dhe pritjet që ka kjo parti. Ai thotë se për LDK-në gara kryesore dhe më e vështira do të jetë në Prishtinë.

“Në rrethin e dytë në Prishtinë padyshim se do të jemi në garë me Lëvizjen Vetëvendosjen. Përshtypja ime personale është se në Podujevë kandidati ynë do të fitojë pa balotazh”, deklaroi nënkryetari i LDK-së në Debat Plus.

“Rezultati i mirë për LDK-në është numri i kandidatëve tanë që fitojnë garat për kryetarë të komunave. Rezultati politik i LDK-së do të jetë numri i votave që marrin asamblistët. Pasi ajo është lista e pastër politike që votohet nga qytetarët. Pritjet tona janë që të marrim komunat që kemi dhe Prishtinën e Podujevën”, tha ndër të tjera Shala.

Të tjera