Lajme

Sallahu: Vonesat në vlerësim të kushtetutshmërisë të projektligjeve, të tejzgjatura

Autori: Gazeta inFokus 19:10 | 04 November 2023

Zëvendësministri i Drejtësisë, Blerim Sallahu, vlerësimet e kushtetutshmërisë së projektligjeve po i cilëson si të “vonuara”, “të tejzgjatura” dhe “të paarsyeshme”.

Ai në një postim në Facebook, tha se “ky është cenim i drejtpërdrejt i demokracisë përfaqësuese, dhe i funksionit kushtetues legjislativ i Gjykatës Kushtetuese”.

“Jo pa shkak, në Ligjin për Gjykatën Kushtetuese janë vendosur afate nga Kuvendi i Kosovës se kur duhet të përfundojë vlerësimi i kushtetutshmërisë së një akti të miratuar në Kuvendin e Kosovës”, shkroi Sallahu, njofton Klankosova.tv.

-Advertisement-

Ndërkaq Sallahu shtoi se afati i vetëm i respektuar nga Gjykata Kushtetuese në shqyrtim dhe vlerësim të kushtetutshmërisë së akteve të Kuvendit “është afati joligjor”.

“Për më tepër, kjo sjellje joligjore e Gjykatës Kushtetuese godet në thelb politikat ligjore të pushtetit ekzekutiv dhe legjislativ, si dhe funksionet e tyre kushtetuese në përmbushjen e interesave të qytetarëve të Kosovës”, përfundoi zëvendësministri i Drejtësisë, Blerim Sallahu.

Subscribe në YouTube: GAZETA INFOKUSI