Në emisonin për ekonominë “EURO n’7” është diskutuar buxheti i vitit 2024 i cili është votuar vetëm nga pozita, ndërsa opozita e ka quajtur si buxhet politik i partisë në pushtet.

Rreth ndarjes së buxhetit edhe shoqëria civile ka pasur vërejtjet e saj, pasi instituti GAP ka prezantuar tabela ku tregohet pjesa më e madhe e buxhetit dhe projekteve të ministrive ka shkuar në katër komunat që udhëhiqen nga LVV.

Bekim Salihu analist i politikave në Institutin GAP ka thënë se nga 21 milionë eurot për projekte të reja, 13 milionë kanë shkuar në katër komunat që udhëhiqen nga LVV, ndërsa gjitha komunat e tjera kanë marrë 8 milionë euro.

Sipas analizës së Institutit GAP kjo ndarje është bërë edhe për shkak të lidhjeve politike që këto katër komuna, Podujeva, Shtimja, Gjilani e Kamenica, kanë me qeverinë qendrore.

Ndarja e tillë e buxhetit sipas Salihut nuk paraqet shkelje ligjore ngase është në diskrecionin e ministrive se ku ato i orientojnë politikat dhe investimet e tyre.

“Këtu nuk kemi të bëjmë me shkelje ligjore por kemi të bëjmë me shkeljen e parimit ose proklamimit që e ka bërë kjo qeveri kur ka ardhur në pushtet, për shkak të njëjtit kanë premtuar se gjatë qeverisjes së tyre nuk do të ndodh ndarje politike e buxhetit. Përveç kësaj kjo qeveri ka premtuar se do të themeloj garantin e katër që do të parandalonte një ndarje të tillë buxhetore por që as kjo nuk ka ndodhur, pra lidhur me ndarjen e buxhetit janë shkelur premtimet që vet kjo qeveri ka dhënë”, ka thënë Salihu.

Në hulumtimet e mëhershme të GAP-it, sipas Salihut, është vërejtur poashtu se ndarje të tillë të buxhetit ka pasur edhe në të kaluarën por jo në këtë masë.

Nga kjo ndarje politike e buxhetit, ka komuna që nuk kanë përfituar as edhe një cent nga qeveria për projekte të reja, siç është Ferizaj, Gjakova, Skënderaj, Kaçaniku, Hani i Elezit.

“Ndarja të tillë të buxhetit ka pasur edhe në qeverinë Mustafa, qeverinë Haradinaj edhe në qeverinë Thaçi, në përqindje nuk mund t’i referohem saktë. Hulumtimet tona kanë gjetur se edhe në të kaluarën qeveritë i kanë favorizuar komunat që kanë udhëhequr. Në qeverisjen Haradinaj edhe pse projekt nacional ka filluar projekti për ndërtimit e autostradës së Dukagjinit dhe kjo ka qenë favorizim politik poashtu. Pra ka pasur edhe në të kaluarën ndarje të tilla të buxhetit, por ndarja e fundit nuk dërgon mesazh të mirë pasi që kjo tregon se qeveria për dikan është nënë për dikë njerk”, ka thënë mes tjerash Salihu.

Në anën tjetër sipas Salihut komunat për vitin e ardhshëm do të kenë 750 milionë euro apo 100 milionë euro më shumë sesa vitin 2023.

BKT Kosova hap degën më te re në qytetin e Suharekës

Sponsoruar