Opinione

Sa ka rënë numri i serbëve në veri?

Autori: Gazeta inFokus 19:22 | 24 December 2024

Shkruan: Agon Hoti

Në vitin 2011 në veri të Kosovës kishte 37 625 serbë (dhe të tjerë) pa i llogaritur shqiptarët. Në vitin 2024 ky numër ka rënë në 20 948 pa i llogaritur shqiptarët, pra për 13 vite ka rënie prej 45% të numrit të serbëve (dhe të tjerëve).

Nëse shkohet me këtë tempo, atëherë në 15 apo 20 vitet e ardhshme numri i serbëve në veri të Kosovës do të jetë i papërfillshëm. Prandaj, Serbia është e interesuar që të mos arrijë asnjëherë marrëveshje me Kosovën, sepse vetëm kështu i mban gjallë tensionet dhe nacionalizmat aty, përndryshe një veri i Kosovës pa serbë ia djeg Serbisë çfarëdo karte dhe pretendimi territorial në Kosovë.

-Advertisement-

E kam thënë sa e sa herë se është faktori demografik dhe faktori kohë që në plan afatgjatë i japin përparësi Kosovës në dialogun me Serbi. Sepse sa më e qetë gjendja në veri, qoftë edhe me një marrëveshje të përkohshme mes Kosovës dhe Serbisë, do ta përshpejtonte ikjen e serbëve kur ta kuptonin se pak perspektivë u ka ngelur në atë pjesë. Vetëm tensioni dhe nacionalizmi i mban serbët aty, përndryshe qetësia i largon.

E njëjta gjë po ndodh edhe me shqiptarët në Luginë të Preshevës, sepse vetë qetësia që po mbretëron aty po e zbraz frikshëm këtë pjesë nga shqiptarët, ndërsa tensioni e naconalizmi do t’i mbante aty. Mjerisht politika e Kosovës në vend që të vepronte me reciprocitet në Luginë të Preshevës siç po bën Serbia në veri të Kosovës, ajo ka zgjedhur ta përçajë sa më shumë faktorin politik shqiptar në Luginë duke e dobësuar atë dhe defaktorizuar si asnjëherë më parë.

Subscribe në YouTube: GAZETA INFOKUSI