Lajme

Rusia thotë se po pezullon eksportin e drithërave nga Ukraina

Autori: Gazeta inFokus 19:23 | 29 October 2022

Ministria ruse e Mbrojtjes tha të shtunën se Moska do të pezullojë zbatimin e një marrëveshjeje të ndërmjetësuar nga OKB për eksportin e grurit, në bazë të së cilës janë eksportuar më shumë se 9 milionë tonë drithë nga Ukraina, gjë që ka ulur çmimet globale të ushqimit.

Ministria tha se arsye për pezullimin ishte bërë një sulm me dron nga Ukraina kundër anijeve të Flotës ruse të Detit të Zi të ankoruara në brigjet e Krimesë së pushtuar. Rusia thotë se sulmi ndodhi në fillim të së shtunës. Ukraina e ka mohuar sulmin.

Ministri i Jashtëm i Ukrainës, Dmytro Kuleba akuzoi Moskën se po përdorte një “pretekst të rremë” për të pezulluar pjesëmarrjen në korridorin e grurit të Detit të Zi.

-Advertisement-

“U bëj thirrje të gjitha vendeve që t’i kërkojnë Rusisë të ndalë lojërat e saj të urisë dhe t’u ripërkushtohet detyrimeve të saj,” shkruante ai në Twitter.

Një zëdhënës i Sekretarit të Përgjithshëm të Kombeve të Bashkuara Antonio Guterres tha se zyrtarët e OKB-së ishin në kontakt me autoritetet ruse në lidhje me pezullimin e deklaruar.

“Është jetike që të gjitha palët të përmbahen nga çdo veprim që do të rrezikonte Nismën për Drithërat të Detit të Zi, e cila është një përpjekje kritike humanitare që është e qartë se ka një ndikim pozitiv në qasjen në ushqim për miliona njerëz,” tha zëdhënësi Stephane Dujarric.

Deklarata ruse erdhi një ditë pasi zoti Guterres i kërkoi Rusisë dhe Ukrainës të rigjallërojnë marrëveshjen. Zoti Guterres u kërkoi gjithashtu vendeve të tjera, kryesisht në Perëndim, të përshpejtojnë heqjen e pengesave që bllokojnë eksportet ruse të grurit dhe plehrave kimike.

Sekretari i Përgjithshëm i OKB-së nënvizoi urgjencën e rinovimit të marrëveshjes së ndërmjetësuar nga Kombet e Bashkuara dhe Turqia në korrik, e cila skadon më 19 nëntor, “për të kontribuar në sigurinë ushqimore në mbarë botën dhe për të zbutur vuajtjet që kjo krizë e kostos globale të jetesës po shkakton tek miliarda njerëz”, tha zëdhënësi Dujarric.

Ambasadori rus në OKB-së Vassily Nebenzia tha më herët se para se Moska të diskutojë për zgjatjen e afatit të marrëveshjes, duhet që drithërat dhe plehrat kimike ruse të eksportohen në tregun botëror, “gjë që nuk ka ndodhur kurrë që nga fillimi i marrëveshjes.”/VOA

Subscribe në YouTube: GAZETA INFOKUSI