Lajme

Rryma e paguar për serbët e veriut, shkelje e të drejtave të njeriut

Autori: Gazeta inFokus 11:11 | 12 December 2017

Komisioni për të Drejtat e Njeriut, Barazi Gjinore dhe Persona të Pagjetur sot ka diskutuar për raportin e Avokatit të Popullit, në lidhje me faturimin e energjisë elektrike të shpenzuar në katër komunat veriore të Kosovës.

Në Komision ka raportuar Avokati i Popullit, Hilmi Jashari, i cili tha se kostoja vjetore është diku 8 milionë euro, me arsyetimin e ZRRE se KEDS ka humbje të mëdha nëse nuk zbatohet edhe ky vendim.Ai ka thënë se ky vlerësim ka qenë i gabuar dhe diskriminues për të drejtat e konsumatorëve. “Me këtë vendim po dëmtohen qytetarët dhe po krijohen dëme të pa riparueshme”, ka thënë Jashari. “Ne ndërkohë do të kërkojmë edhe kompensimin e dëmeve me një vendim të Gjykatës Themelore”, ka thënë ai. Miljana Nikoliq anëtare e komisionit e ka pyetur Jasharin nëse në faturat që marrin qytetarët e Kosovës shkruan shuma e shpenzuar për veriun.

Jashari tha se arsyetimi përse qytetarët nuk e kanë vërejtur ngarkesën, ka qenë për shkak të çmimit. Sami Kurteshi deputet nga Vetëvendosje tha se nëse është bërë me vetëdije kjo shkelje e qytetarëve, është vepër penale. “Nëse shkon në veri të Mitrovicës me ble naftë duhet me paguar me para, ndërsa si është e mundur t’u dërgohet qytetarëve rrymë në veri pa para. Me këtë akt është vepër penale”, tha Kurteshi. Edhe Mexhide Mjaku deputete nga PDK ka thënë se kjo çështje duhet të bëhet me një rekomandim dhe të diskutohet në seancën e ardhshme të Kuvendit, në ditën edhe kur do të diskutohet një raport i tillë.

-Advertisement-

Ajo shtoi se është shkelje ligjore që qytetarët të paguajnë energji elektrike për qytetarët e veriut. Deputetja e LDK-së Lirije Kajtazi tha kjo çështje është ngritur me të drejtë nga Avokati i Popullit, Hilmi Jashari.

“Ky model i shkeljes së të drejtave të njeriut nuk ekziston askund në botë dhe ky diskriminim pa tjetër duhet të ndërpritet”, ka thënë Kajtazi. Ndërsa deputetja e PDK-së Luljeta Veselaj tha se 8 milionë euro të paguhen për militantët e atyre që kanë vrarë shqiptarë në Kosovë, është dy herë shkelje e të drejtave të njeriut.

Subscribe në YouTube: GAZETA INFOKUSI