Lajme

Rruga e Kombit pa pagesë edhe këtë sezon turistik

Autori: Gazeta inFokus 08:14 | 16 Qershor 2018

Rruga e Kombit do të jetë pa pagesë edhe këtë sezon turistik. Pagesa në këtë rrugë duke filluar me 5 euro për autoveturat dhe 22.5 euro për kamionët ka funksionuar vetëm dy ditë, pikërisht më 29 dhe 30 mars, pasi më 31 mars, protestuesit e irrituar kuksianë shkatërruan dhe më pas i vunë flakën stacionit të mbledhjes së taksës në Kalimash të Kukësit.

Burime të kompanisë koncensionare “Salillari&Kastrati” bëjnë të ditur për “Kohën Ditore” se kompania po punon me ritme të larta që deri më 15 korrik të bëjë gati të gjithë infrastrukturën e dëmtuar të tollit, shkatërruar më 31 mars, shtimin e korsive nga katër në 9 korsi kalimi, si dhe në përmirësimin e sinjalistikës horizontale dhe vertikale të rrugës në stacionin e pagesës dhe pranë tij dhe të infrastrukturës në përgjithësi.

I njëjti burim ka bërë të ditur se pas përfundimit të të gjithë infrastrukturës së nevojshme, koha e mbetur deri në shtator do të shërbejë për përgatitjet për fillimin e pagesës.

-Advertisement-