Ministri i Punëve të Brendshme, Xhelal Sveçla, ka mbajtur konferencë për media bashkë me drejtorin e përgjithshëm të Policisë së Kosovës, Gazmend Hoxhën.

Përpara medieve Sveçla dhe Hoxha kanë folur për gjendjen e sigurisë në trafikun rrugor.

Sveçla tha se aksidentet me fatalitet janë tejet shqetësuese për autoritetet, sidomos aksidenti që përfundoi me fatalitet për tre të rinj në Prizren dhe ai i mbrëmshmi në Podujevë.

-Advertisement-

“Bashkë me drejtorin e përgjithshëm të PK-së kemi diskutuar për masat që duhet të merren, sidomos për masat ndaj garave me automjetet automobilistike. Vitin që po e mbyllim edhe pak ditë, PK ka shqiptuar 76 gjoba ndaj personave që kanë organizuar gara të jashtëligjshme. Policia e Kosovës të njëjtit grup të së shtunës ua kishte parandaluar organizimin e garave. Të njëjtit kishin edhe gjoba”, tha Sveçla.

Ministri Sveçla shtoi se zyrtarët e trafikut janë pajisë me kamera dhe pajisje të mençura për identifikim të shkelësve të rregullave të komunikacionit.

Në anën tjetër, drejtori i përgjithshëm i Policisë së Kosovës, Gazmend Hoxha, deklaroi se kjo temë e shumë e ndjeshme.

Hoxha ka prezantuar shkaqet e aksidenteve përgjatë vitit duke treguar se nga përqindja më e madhe e aksidenteve me fatalitet, më së shumti kanë pësuar shoferët.

Ai shton se Policia e Kosovës ka planifikuar masa shtesë për sigurinë në trafik, përfshirë shtimin e njësiteve, inspektimeve lokale, teksa bën apel te të gjithë që të ketë më shumë kujdes.

Nga Plani Operativ për parandalimin e garave me automjete, nga 1 prilli e deri më sot janë shqiptuar 193 gjoba, janë konfiskuar 10 automjete dhe janë parandaluar 50 gara në të gjithë territorin e vendit.

Nga 1 janari e deri më 18 dhjetor, Hoxha thotë se janë shkaktuar 93 aksidente me fatalitet nga të cilat kanë vdekur 103 qytetarë.

Më së shumti aksidente me fatalitet pati në korrik, me 18 aksidente me fatalitet dhe 18 jetë të humbura.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-