Ka më shumë se një muaj që Inspektorati Farmaceutik po pret rezultatin e një mostre të produktit “kontrast” që u përdor në Qendrën Klinike Universitare të Kosovës e që dyshohet se shkaktoi efekte anësore të rrezikshme tek pacientët.

Mirëpo rezultatin e kësaj mostre të cilën Inspektorati e ka dërguar për analizë në Laboratorin e Cilësisë – AKPPM, nuk e mori ende.

Këtë e kanë konfirmuar në një përgjigje dhënë për Gazetën Infokus ku theksohet se pas pranimit të rezultatit, Inspektorati do të marrë të gjitha masat e nevojshme sipas ligjit.

“Inspektorati Farmaceutik ka kryer procedurat inspektuese lidhur me shqetësimin e ngritur, me ç’rast ka marrë mostren dhe ka derguar në LKC/.AKPPM Inspektorati Farmaceutik është ende në pritje të rezultateve. Pas pranimit të rezultateve nga LKC/AKPPM, Inspektorati Farmaceutik në bashkëpunim me institucionet relevante do të veprojë sipas dispozitave ligjore në fuqi”, thuhet në përgjigjen e tyre.

Gazeta Infokus ka raportuar një muaj më parë që kontrasti që u ble nga QKUK-ja ishte prodhim kinez derisa dyshohet se ka shkaktuar efekte anësore goxha të rrezikshme tek pacientët, e si pasojë e kësaj, Inspektorati Farmaceutik kishte nisur hetimet dhe ndaloi përdorimin e këtij produkti deri në zbardhjen e terësishme të rastit.

Lexo edhe:

Pacientët në rrezik nga kontrasti kinez i blerë nga QKUK-ja, Inspektorati nisë hetimet

“Kontrasti” është një substancë që përdoret për të përmirësuar shikueshmërinë e strukturave të brendshme të trupit gjatë ekzaminimeve imazherike, si, Rëntgen (X-ray), CT (Tomografi e Kompjuterizuar), MRI (Rezonancë Magnetike), Angiografi (imazhe të enëve të gjakut) e të tjera.

Si ndodhi rasti dhe cila kompani e furnizoi QKUK-në me këtë produkt të dyshimtë?

QKUK-ja u përball me mungesë të kontrastit qysh nga fundi i vitt 2024. Kjo pasi pati probleme me tenderimin e vonesa nga kompania e cila u kontraktua.

Kontrata u anulua hiq më pas se katër herë sipas përgjigjes që Drejtoria e SHSKUK-së i dha Gazetës Infokus.

E edhe pas nënshkrimit të kontratës pati vonesa në furnizimin e klinikave dhe kjo nuk ndodhi deri në fund të muajit janar të vitit 2025.

Kompania e cila ka furnizuar QKUK-në me kontrastin jojonik kinez duket të jetë e njohur për problemet që i ka sjellë shëndetit publik.

“Liri – Med SH.P.K” ishte dënuar me 17 mijë euro nga SHSKUK-ja pasi edhe një herë tjetër nuk i kishte dërguar barnat me kohë në Qendrën Klinike Universitare të Kosovës.

Madje sipas raportimeve në media Kompania e biznesmenit Lirim Mustafa, “Liri-Med”, është dënuar më shumë se 15 herë me gjobë nga Shërbimi Spitalor i Kosovës vetëm në vitin 2024.

Me 4 korrik 2024 ishte dënuar me gjobën 7 mijë 863 euro nga Shërbimi Spitalor i Kosovës, edhe për mosliferim të mallit.

Mirëpo Shërbimi Spitalor Klinik Universitar i Kosovës vazhdon ti japë tenderë kësaj kompanie problematike e cila ndër të tjera dyshohet edhe se rrezikoi jetët e pacientëve duke i furnizuar klinikat me kontrast kinez.

Gazeta Infokus ka më shumë se dy javë që ka provuar të marrë një përgjigje nga Drejtoria e ShSKUK-së se pse pavarësisht gjithë këtyre problemeve të vazhdueshme që i ka sjellë kompania “Liri – Med” sërish ata kanë vazhduar bashkëpunimin duke i dhënë para nga buxheti i shtetit mirëpo deri në publikimin e këtij artikulli nuk kanë kthyer ndonjë përgjigje.

BKT Kosova lanson Kredinë për Ekonominë Qarkore – e para dhe e vetmja e këtij lloji në Kosovë

Sponsoruar