Lajme

Rreth tetë mijë të rinj mësyjnë UP-në, këto janë drejtimet më të kërkuara

Autori: Gazeta inFokus 11:36 | 29 August 2021

7 mijë e 741 të rinj po kërkojnë që të jenë pjesë e Universitetit të Prishtinës për të ndjekur profesionin që e dëshirojnë.

Nga ky numër, preferencat më të mëdha janë për programet në Fakultetin e Mjekësisë, në veçanti programi- Mjekësi e Përgjithshme.

Konkurrenca në këtë Fakultet është aq e madhe, ku nga gjashtë persona që kanë aplikuar do të pranohet vetëm një, shkruan Gazeta Infokus.

-Advertisement-

Pas këtij Fakulteti, interesimi më i madh është në programin e Edukimit fillor në Fakultetin e Edukimit, duke u ndjekur pas nga programi i Psikologjisë në Fakultetin Filozofik.

Pastaj, në Fakultetin e Filologjisë numri më i madh i aplikimeve ka qenë në programet Gjuhë dhe Letërsi Angleze, Gjuhë dhe Letërsi Gjermane si dhe Programi i studimeve të Arkitekturës.

E në Fakultetin e Inxhinierisë Elektrike dhe Kompjuterike, programi me interesimin më të madh është programi i Shkencave Kompjuterike dhe Softuerike.

Ndërsa, programet me interesimin më të vogël, e ku numri i aplikimeve nuk është plotësuar, janë programet studimore të Fakultetit teknik, Fakultetit të Shkencave Matematikore Natyrore, si dhe të Fakultetit të Bujqësisë dhe Veterinarisë.

Këto informacione për Gazetën Infokus i ka dhënë Rektorati i Universitetit të Prishtinës.

Kujtojmë që nga njoftimi i UP-së, numri total që do të pranohen për këtë afat do të jetë 6.247 studentë të rregullt. Ndërsa, provimet pranuese do të mbahen nga 31 gushti deri më 4 shtator.

Afati për regjistrimin e studentëve të rinj për studimet themelore –baçelor të vitit akademik 2021/22, ka qenë prej gjashtë gusht e deri me 24 gusht. Ndërkaq, dorëzimi i dokumentacioneve është bërë në mënyrë fizike vetëm për kandidatët të cilët kanë aplikuar online.

Afati për dorëzimin e dokumenteve ka qenë prej datës 25  gusht e deri dje me 28 gusht./Gazeta Infokus/

Comodita Home rikthen “Garage Sale” për edicionin e tetë, me zbritje deri në 70%
-Advertisement-

T� tjera

Fokusi

lajme

Ky website përdor cookies. Duke vazhduar përdorimin, ju pranoni përdorimin e tyre.

Privacy policy