Lajme

Rreth 900 mijë qytetarë të regjistruar, Kastrati: Komuniteti serb ende heziton në mënyrë masive

Autori: Gazeta inFokus 11:27 | 29 Prill 2024

Ushtruesi i detyrës së drejtorit të Agjencisë së Statistikave të Kosovës, Avni Kastrati në konferencën për media ka bërë të ditur se deri më tani janë regjistruar rreth 900 mijë qytetarë.

Ai është shprehur se procesi i regjistrim të popullsisë është duke shkuar ashtu siç është planifikuar.

“Jemi në ditën e 24-të të punës në terren dhe shpresojmë që do të jemi në kohë, bazë të planit qe e kemi bërë deri më 17 maj. Procesi i regjistrim të popullsisë është duke shkuar ashtu siç është planifikuar”.

-Advertisement-

“Ne e kemi theksuar se regjistrimi i popullsisë, përveç që është e mirë, një obligim, është edhe me ligj e rregulluar dhe ASK-ja të gjithë ata që refuzojnë të marrin pjesë do t’i përcjellë në institucionet e tjera që janë të thirrura për legjislacion. Është rreth 900 mijë iu kemi afruar dhe besoj se do të jemi në kohë, deri më tani janë regjistruar mbi 891 mijë banorë të Kosovës”, është shprehur ai.

Kastrati gjithashtu u shpreh se komuniteti serb ende po heziton në mënyrë masive.

“Në pjesën veriore, në katër komunat në veri, ku është komuniteti serb, sepse komunitetet tjera janë duke u regjistruar, në ato komuna jetojnë edhe komunitete të tjera, ata janë regjistruar pjesa dërrmuese, ndërsa komuniteti serb ende heziton në mënyrë masive, ka një regjistrim, por është numri i vogël në bazë të atyre që ne pretendojmë”, është shprehur ai.