Lajme

Rinumërohen 55 nga 280 kuti votimi

Autori: Gazeta inFokus 08:51 | 22 June 2017

KQZ-ja ka marrë vendim që të rinumërohen edhe 280 kuti të votimit, rekomandim ky i Qendrës së Numërimit dhe Rezultateve.

Prej tyre 150 në rinumërim të pjesshëm, ndërsa 130 më rinumërim të plotë. Rinumërimi i tyre do të bëhet për shkak të mospërputhjes së të dhënave të kandidatëve dhe subjekteve politike.

Zëdhënës të KQZ-së kanë treguar për gazetën “Zëri” se deri më tani nga 280 kuti janë rinumëruar 55, ndërsa pothuajse ka përfunduar regjistrimi i votuesve me kusht.

-Advertisement-

Ndërsa përfaqësues të organizatave joqeveritare kanë thënë se e vetmja arsye pse do të duhet të ndodhë ky rinumërim është evitimi i parregullsive, e jo për synime të tjera.

Mirëpo, këtë rinumërim ata e kanë cilësuar si punë të dobët të komisionarëve gjatë ditës së votimit dhe trajnim jo të mjaftueshëm të tyre nga KQZ-ja.

Ata mohojnë mundësinë e ndryshimit të rezultateve që i kemi deri më tani.

Valmir Elezi, zëdhënës nga Komisioni Qendror Zgjedhor, ka thënë se nga 280 kuti janë rinumëruar 55 dhe 19 të tjera janë në proces.

“Në Qendrën e Numërimit dhe Rezultateve është duke vazhduar procesi i rinumërimit në bazë të planifikimeve të mëparshme. Deri më tani është bërë rinumërimi i plotë i 55 kutive të votimit dhe 19 tjera janë në proces. Edhe proceset tjera janë pothuajse afër kompletimit. Futja e të dhënave nga Formularët e Rezultateve për Subjekte Politike (FPR) është kompletuar më shumë se 99%, kurse Formularët e Rezultateve të Kandidatëve (FRK) janë kompletuar rreth 90%”, tha ai.

Subscribe në YouTube: GAZETA INFOKUSI