Zëvendëskryeministrja e Kosovës për Çështje të Pakicave dhe Drejtat e Njeriut, Emilija Rexhepi, gjatë takimit të radhës të Grupit koordinues ndërinstitucional për të drejtat e njeriut ka thënë se Kosova ka shënuar lëvizje pozitive në mbrojtjen e të drejtave të njeriut, ndërsa sfidë mbetet pjesa veriore e Kosovës dhe integrimi dhe afirmimi i komunitetit serb.

Rexhepi u shpreh se ka edhe lëvizje pozitive në implementimin e ligjshmërisë në fushën e të drejtave të njeriut. Ajo e ka theksuar si problem gjuhën e urrejtjes në rrjetet sociale.

“Në rrjetet sociale gjuha e urrejtjes është shumë e madhe, që sipas meje paraqet një problem të madh edhe më tutje e cila mund të paraqitet më shumë në vitet në vijim,. Ajo është një prej fenomeneve brengosës në shoqërinë tonë. Shoqëria jonë duhet të edukohet më shumë nëpërmes programeve të ndryshme me dialogun ndëretnik duke luftuar specifika të ndryshme të popullatës në vendin tonë“, ka deklaruar Rexhepi.

Teksa ka listuar disa nga të arritura që sipas saj janë bërë, Rexhepi u shpreh se sfidë mbetet integrimi i të drejtave dhe afirmimi i komunitetit serb në veri të Kosovës. Ajo tha se si shtet duhet të ofrohet respektim për të gjithë qytetarët të Kosovës duke nisur nga Leposaviqi e deri në Dragash.

“Jemi dëshmitarë të lëvizjeve pozitive për kontekstin e mbrojtjes të të drejtave të njeriut në Kosovë, ballafaqohemi edhe me sfida të mëdha e të cilat na përcjellin nga 2022 në veri të vendit tonë dhe kërkojmë vëmendjen tonë të pandërprerë për integrimin e të drejtave, afirmimin e komunitetit serb, gjegjësisht të sigurohen të drejtat e komunitetit pakicë, ashtu siç parasheh edhe Kushtetuta e Kosovës dhe ajo duhet për garantimin dhe avancimin e standardit universal të të drejtave të njeriut për të gjithë qytetarët e vetë dhe si shteti që anon kah shoqëri inkluzive dhe jemi të obliguar që të gjithë mundësitë t’u japim që këto të drejta të respektohen për secilin qytetarët duke filluar nga Leposaviqi e deri në Dragash“, theksoi ajo.

Avokati i Popullit, Naim Qelaj, e ka konsideruar inkurajues faktin që janë rritur përpjekjet për zbatim të rekomandimeve të jepen nga institucioni që drejton ai.

“Inkurajuese dhe çka dua të shpreh falënderim të veçantë është përpjekja që po bëjnë autoritetet me kuptua rëndësinë që ka zbatimi i rekomandimeve të Avokatit të Popullit dhe kjo mëritë pa dyshim që i takon politikave që zbaton qeveria”, theksoi ai.

Drejtori i Zyrës për Qeverisje të Mirë në kuadër të Zyrës së Kryeministrisë, Habit Hajredini, u shpreh se programi qeverisës për të drejtat e njeriut ka katër objektiva kryesore si: përmirësimi i qeverisjes, mbrojtjen dhe promovimin e të drejtave të njeriut, promovimi i jetës së shëndetshme dhe lehtësimi i qasjes në sistemin e drejtësisë.

Bazuar në këtë program, Hajredini u shpreh se ka disa përmirësime kyçe si futja në funksion i kornizës së tregues të të drejtave të njeriut, respektimi i rekomandimeve të Avokatit të Popullit dhe të tjera. Krahas të arriturave, Hajredini theksoi se nevojitet mobilizim institucional për zbatimin e ligjeve për të drejtat e njeriut./ kp

Comodita Home nis epokën e franshizës në Belgjikë

Sponsoruar