Lajme

Rexhep Selimi trondit me deklaratën: Komunikatën 59 kundër Gani Gecit e ka shkruar Hashim Thaçi

Autori: Gazeta inFokus 22:36 | 27 November 2019

Deputeti i zgjedhur i Lëvizjes Vetëvendosje, Rexhep Selimi, si asnjë herë më parë ka folur për ngjarje të rënda të ndodhura gjatë periudhës së luftës së UÇK-së.

Selimi ka thënë se vrasjet e pasluftës janë bërë në atë mënyrë që të mos mund të zbardhen.

Ai ka thënë se zbardhja e një vrasjeje të pasluftës do të zbardhte në mënyrë zinxhirore të gjitha rastet e tjera të vrasjeve të pasluftës.

I pyetur për rolin e tij në cilësinë e ministrit të Rendit Publik në kohën e Qeverisë së Përkohshme të Hashim Thaçit, Selimi thotë se nuk ka pasur asnjë kompetencë të sigurisë.

Ish-anëtari i Shtabit të Përgjithshëm të UÇK-së ka thënë se mban përgjegjësi vetëm për objektivat që ka pasur UÇK-ja gjatë luftës.

“Unë nuk mund të mbajë përgjegjësi për veprimet e cilitdo individë për veprimet e tyre në emër të UÇK-së”.

Selimi ka thënë se “nuk do t’ia kthejë shpinën telasheve që ka UÇK-ja”, por thotë se shkruaja e komunikatave nuk ka qenë punë e tij.

“Po dalin fakte të reja se komunikatat e UÇK-së janë shkruar nga ‘banhofi’”.

Ish-anëtari i Shtabit të Përgjithshëm të UÇK-së ka thënë se Komunikatën numër 59 e ka shkruar Hashim Thaçi.

“Komunikatën numër 59 e ka hartuar dhe lëshuar Hashim Thaçi”.

Selimi ka thënë se Hashim Thaçi kur është pyetur për këtë komunikatë më mirë është dashur të heshtë se sa të drejtojë përgjegjësinë të dikush tjetër.

Në komunikatën me numër 59 e lëshuar në kohën e luftës, ndër të tjera thuhej: “Abedin Rexha u vra nga kolaboracionisti me damkë Gani Geci, i lindur në Llaushë, i cili edhe më herët e edhe gjatë ofensivës së fundit serbe, është parë i maskuar duke i prirë policisë serbe në masakrat që u kryen mbi popullin civil të Drenicës”, ka thënë Selimi në TV Dukagjini.

Të tjera