Refuzimi i projektit amerikan për gazsjellësin nga ana e Qeverisë Kurti po cilësohet nga kryetari i Komisionit parlamentar për Ekonomi, Industri, Ndërmarrësi dhe Tregti, Ferat Shala, si veprim i gabuar.

Madje, ai e sheh këtë veprim si tepër shqetësues për Kosovën.

Në një prononcim për Gazetën Infokus, Shala ka thënë se një veprim i tillë nuk do duhej të guxonte të ndodhte.

-Advertisement-

“Refuzimi i projektit të gazsjellësit nga Qeveria e Kosovës është jashtëzakonisht shqetësues për vendin, është jashtëzakonisht shqetësuese për ekonomin tonë, është jashtëzakonisht i dëmshëm strategjikisht për relacionin gjeopolitik të Kosovës. Një veprim të tillë nuk do të duhej të guxonte asnjë qeveri kushdo qoftë ajo ta bënte”, ka thënë ai.

Shala ka thënë se arsyeja se pse ky vendim është i gabuar sidomos në ekonomi është pikërisht se Kosova humb shumë për shkak të mungesës së projekteve dhe detyrohet të importojë energjinë nga kompanitë sllave.

Për Infokus, ai ka deklaruar se nëse e marrim në kuptimin praktik të sektorit të energjisë ky është një favor i madh që do u bëhet atyre kompanive, por që në asnjë rrethanë nuk do duhej t’u bëhej nga Qeveria e jonë.

Shala gjithashtu ka thënë se ky vendim i Ministrisë së Ekonomisë i ka hapur rrugë gazsjellësit rus.

“Strategjikisht, refuzimi i hapë rrugë gazsjellësit verior rus. Pra, në Ballkan, deshëm ne apo s’deshëm duhet të vijë një gazsjellës, qoftë ai i Jugut që është amerikan, qoftë ai nga Veriu që është rus. Refuzimi i gazsjellësit që është bërë në një farë forme hap portën me ardhur në shprehje relacionet e kompanive veriore Ruse që merren me këtë problematik”, ka thënë Shala për Infokus.

Kujtojmë se gjatë ditës së djeshme, ministrja e Ekonomisë dhe Ndërmarrësisë, Artane Rizvanolli bëri të ditur se Qeveria e Kosovës nuk do të vazhdojë tutje me projektin për kyçjen e Kosovës në gazsjellësin ekzistues në Maqedoninë e Veriut, projekt ky i përkrahur nga MCC-ja amerikane. /Gazeta Infokus/

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-