Fokus

Reciprociteti në targa ndaj Serbisë, ekspertët e sigurisë flasin për Infokus

Autori: Doresa Geci 16:18 | 21 September 2021

Që nga dita e hënë, autoritetet në Kosovë janë vënë në zbatim të vendimit të Qeverisë për vendosjen e masës së reciprocitet në targa me Serbinë.

Me vendimin qeveritar, automjetet që vijnë nga Serbia duhet të pajisen me tabela RKS, shkruan Gazeta Infokus.

Një masë e tillë reciprociteti është parë në pikëpamje të ndryshme nga ekspertet e sigurisë.

Nuredin Ibishi, njohësi i çështjeve të sigurisë, thotë se ky vendimi nuk e kufizon lëvizjen e lirë të qytetarëve serbë, shkruan Gazeta Infokus.

“Kjo nuk ka të bëjë më kufizimin e lëvizjes së lirë, por përkundrazi përcakton masat që janë minore reciproke në krahasim me masat që ka vendosur Serbia. Tash reagimi i serbëve ka bërë që të bllokohen rrugët edhe kjo besoj që nuk do të zgjasë shumë, por na duhet të jemi të vëmendshëm, sepse regjimi serb do të shfrytëzoj këtë”, ka deklaruar Ibishi për Infokus.

Ndërsa eksperti i sigurisë, Bedri Elezi, ka kërkuar nga të gjithë t’i respektojnë veprimet e Policisë të cilët janë duke e zbatuar ligjin.

“Policia e Kosovës, përkatësisht Njësia Speciale, ka vepruar konform detyrave dhe përgjegjësive të cilat burojnë nga autorizimet ligjore të Qeverisë së Republikës së Kosovës, ligje të cilat janë të zbatueshme në gjithë territorin e RKS-së. Këto veprime policore duhet përshëndetur nga të gjithë, pavarësisht përkatësisë etnike. Të gjithë etnitetet në Kosovë duhet t’i respektojnë veprimet policore të cilat janë konform ligjeve në fuqi, në të kundërtën policia e ka për obligim zbatimin e ligjeve, pavarësisht rajoneve”, ka thënë Elezi për Infokus.

Vendimi i Qeverisë së Kosovës për vendosjen e targave të përkohshme RKS në automjetet që vijnë nga Serbia, mund të cenojë sigurinë e përgjithshme në Kosovë.
Kështu ka deklaruar për Gazetën Infokus, eksperti tjetër i çështjeve të sigurisë, Drizan Shala.

Shala ka thënë se një veprim i tillë mund të nxisë, presidentin e Serbisë, Aleksandër Vuçiq, që të bëjë veprime kriminale.

“Duhet analizuar nëse ky veprim e cenon sigurinë e përgjithshme në atë pjesë të territorit, si dhe a mund të pengoj mbarëvajtjen e punës së pikave kufitare me shtetin e Serbisë. Kjo mbetet të shihet se si do ta përdor këtë veprim Beogradi zyrtar në Bruksel. Në anë tjetër, siç dimë, presidenti i Serbisë, Aleksandër Vuçiq, deri më tani dhe në të kaluarën ka përdorur mekanizma kriminal për të jetësuar interesat politike në territorin e Kosovës, siç ishte djegia e pikave kufitare pas shpalljes së pavarësisë më 2008”, ka thënë Shala për Infokus.

Sipas vendimit të Qeverisë, obligohen që të gjitha automjetet që mbajnëtarga të Serbisë dhe hyjnë në Kosovë të pajisen me targa të përkohshme, që sipas këtij vendimi pajisja me këto targa bëhet në të gjitha pikat kufitare të Kosovës.

Targat duhet të vendosen në vende të dukshme dhe për pajisjen me këto targa duhet paguar taksa prej 5 eurove./Gazeta Infokus//

Të tjera