Lajme

Reagon ish-ministrja e Punëve të Jashtme: Mostransparenca e ministres rreth takimit të saj me ministrin palestinez e dëmton Kosovën

Autori: Gazeta inFokus 13:57 | 05 April 2022

Ish-ministrja e Punëve të Jashtme, Meliza Haradinaj, përmes një postimi në rrjetin social “Facebook”, ka thënë se mostransparenca e kryediplomates Donika Gërvalla për takimin me homologun e saj palestinez e dëmton marrëdhënien e re të Kosovës me Izraelin dhe interesat afatgjate të Kosovës për të siguruar njohje të reja në Lindjen e Mesme.

Gjithashtu ajo ka thënë se Kosova ka punuar shumë për të zbrapsur kampanjën ilegale të Serbisë për të penguar e dëmtuar njohjet ekzistuese dhe ato potenciale të Republikës së Kosovës.

“Kosova përveç që ka punuar shumë për të ndërtuar marrëdhënie zyrtare diplomatike me Shtetin e Izraelit, ka bërë përpjekje të mëdha për të zbrapsur kampanjën ilegale të Serbisë për të penguar e dëmtuar njohjet ekzistuese dhe ato potenciale të Republikës së Kosovës”, ka shkruar Haradinaj-Stublla.

-Advertisement-

Ndërkaq, ajo ka thënë se Ministria e Punëve të Jashtme duhet të sqarohet më një deklaratë publike rreth takimit, temave, dhe pozicionit të Kosovës rreth asaj që ka deklaruar MPJ e autoriteteve palestineze pas takimit me Kosovën.

“Heshtja e Ministres sonë hodhi poshtë gjithë këtë mund, duke ia dhuruar terrenin diplomatik vetëm Palestinës dhe Serbisë për të amplifikuar mesazhet e interesit të tyre që bie ndesh me interesat shtetërore të Kosovës dhe duke vendosur Kosovën automatikisht në pozicion defanziv dhe të dëmshëm. MPJD duhet urgjentisht të sqarohet me një deklaratë publike në shqip dhe anglisht rreth takimit, temave, dhe pozicionit të Kosovës rreth asaj që ka deklaruar MPJ e autoriteteve palestineze pas takimit me Kosovën, për të riparuar dëmin tashmë të shkaktuar me Shtetin mik të Izraelit”, ka shkruar ish-ministrja e Punëve të Jashtme./Gazeta Infokus/

Subscribe në YouTube: GAZETA INFOKUSI