Pas raportimeve për manipulim të votave në Vushtrri dhe fillimit të hetimeve nga Prokuroria e Shtetit, ka ardhur një reagim nga Betim Grabanica, i cili po dyshohet se ka ndikuar në numërimin e votave në favor të kandidatit të LDK-së, Xhafer Tahiri.

Në një postim në Facebook, Grabanica, i cili është edhe sekretar i degës së LDK-së në Vushtrri, është përpjekur të shfajësohet duke e zhvendosur vëmendjen nga vetja dhe duke pretenduar se ka qenë ai që ka raportuar parregullsi në numërim.

Sipas tij, në Qendrën e Votimit 2709/01, ku ai ishte kryesues, është hasur një fletëvotim i pavulosur, pas së cilës ai dhe ekipi i tij kanë ndërprerë procesin dhe kanë njoftuar KKZ-në.

“Pas hasjes së një fletëvotimi të pavulosur, menjëherë kemi ndërprerë procesin e numërimit dhe kemi njoftuar personat përgjegjës të KKZ-së, pasi sipas rregullave të KQZ-së, në momentin kur haset një votë e parregullt, i gjithë procesi i numërimit kthehet në pikën zero”, ka shkruar ai në Facebook.

Por ndryshe nga sa pretendon ai, burime nga kandidatët e LDK-së kanë pohuar se dyshimet mbi të kanë ardhur nga brenda partisë, pasi ai ishte personi që kishte kontroll mbi numërimin e votave dhe kishte tentuar të ndikonte rezultatin në favor të Xhafer Tahirit.

“Na kanë njoftuar se i njëjti, për dy ditë radhazi, ka mbajtur dy ndërrime. Sot, pasi organet e drejtësisë ishin informuar dhe një hetues nga prokuroria kishte shkuar në Qendrën e Numërimit të Votave, ai ishte larguar duke u arsyetuar se kishte një familjar të sëmurë”, kishte thënë një nga kandidatët e LDK-së për Gazetën Infokus.

Për më tepër, burimet tregojnë se Grabanica është raportuar me emër dhe mbiemër në prokurori dhe PZAP, duke u akuzuar për manipulim të votave dhe për ushtrim presioni mbi komisionerët e tjerë që të ndikonin në favor të kandidatit të tij.

Në përpjekje për të larguar dyshimet nga vetja, Grabanica në reagimin e tij e ka zhvendosur fajin te “problemet sistemore” të zgjedhjeve. Ai ka akuzuar se “në qendrat e votimit janë gjetur fletëvotime të pavulosura dhe ndërhyrje në listat e votuesve”, duke pretenduar se janë elemente të njohura të manipulimeve zgjedhore.

Megjithatë, një fakt mbetet i qartë: ai është personi i dyshuar për manipulimin e votave në Vushtrri. Dhe ndonëse mundohet të shfaqet si “denoncues i manipulimeve”, raportimet nga kandidatët e partisë së tij dhe hetimet e nisura nga Prokuroria dhe PZAP tregojnë një realitet krejt tjetër.

“Jam i hapur për çdo hetim. Nuk jam ftuar as nga policia dhe as nga prokuroria, por jam i gatshëm të ndihmoj organet kompetente që e vërteta të dalë në shesh”, ka deklaruar ai.

Si rezultat i këtyre dyshimeve dhe hetimeve, tashmë është vendosur që votat nga disa qendra të votimit në Vushtrri të kthehen edhe një herë në rinumërim. Kjo vjen pas ankesave të kandidatëve të partive të ndryshme dhe raportimeve për manipulime, që kanë ndikuar në transparencën dhe besueshmërinë e procesit zgjedhor në këtë komunë.

Ndërkohë, Prokuroria e Shtetit po vazhdon hetimet për të verifikuar nëse Grabanica dhe ekipi i tij kanë ndikuar në rezultatin zgjedhor për të favorizuar Xhafer Tahirin.

/Gazeta Infokus

Super Zbritje në Artmotion

Sponsoruar