Sport

Reagimi i kryetarit të FFK-së pas sulmit me tritol në shtëpinë e Armando Dukës

Autori: Gazeta inFokus 10:12 | 25 January 2022

Kryetari i Federatës së Futbollit të Kosovës, Agim Ademi, ka reaguar pasi të hënë mbrëma është sulmuar me tritol shtëpia e kryetarit të FSHF-së, Armando Duka, shkruan Gazeta inFokus.

Ademi përmes një postimi në llogarinë e tij zyrtare në Facebook është shprehur i tronditur me ngjarjen e ndodhur në shtëpinë e familjes Duka në Durrës.

I pari i shtëpisë së futbollit në Kosovës tutje ka thënë se ky akt kriminal e i shëmtuar përveç frikës e tronditjes në familjen Duka, është edhe një ngjarje e rëndë edhe për futbollin shqiptar dhe Shqipërinë si shtet në përgjithësi.

“I tronditur me lajmin që mbrëmë vonë është sulmuar me tritol shtëpia e presidentit të FSHF-së, Armand Duka në Durrës.

Akti i tillë kriminal e i shëmtuar përveç se ka shkaktuar frikë e tronditje në familjen Duka, pa dyshim është një ngjarje e rëndë edhe për futbollin shqiptar dhe Shqipërinë si shtet në përgjithësi, veçmas duke pasur parasysh faktin se z. Duka është edhe anëtar i KE të UEFA-s.

Fatmirësisht miku im Armand Duka dhe familja e tij janë mirë dhe kanë kaluar pa pasoja nga ky akt i njerëzve të ligë.

Familjes së tij i ofroj tërë mbështetjen time dhe të komunitetit të futbollit kosovar, me shpresë që kryerësit e këtij akti të vihen para drejtësisë dhe në të ardhmen të mos ballafaqohet me ngjarje të tilla”, ka shkruar Agim Ademi në Facebook.

Sulmi ndaj Armando Dukës ka ardhur në prag të zgjedhjeve në Federatën e Futbollit në Shqipëri, në të cilat Duka synon një mandat të gjashtë radhazi./Gazeta inFokus/

Të tjera

Fokusi

sport