Lajme

Raporti i BE-së: Gati 1 milion njerëz kërkuan azil në BE në vitin 2022

Autori: Gazeta inFokus 11:00 | 05 July 2023

Një numër rekord njerëzish kanë aplikuar për azil në BE, kryesisht nga Siria, Afganistani, Turqia, Venezuela dhe Kolumbia. BE, ndërkohë po e debaton një plan të ri migracioni.

Kërkesat për azil në Bashkimin Evropian në vitin 2022 u rritën në afro një milion, thuhet në një njoftim nga Agjencia e Bashkimit Evropian për Azilin (EUAA).

Agjencia në fjalë tha se kishte 996,000 aplikime vitin e kaluar, 53% më shumë se në 2021.

-Advertisement-

Njerëzit nga Siria, Afganistani, Turqia, Venezuela dhe Kolumbia ishin ndër grupet më të mëdha që kanë aplikuar për azil.

Gjermania mori numrin më të madh të aplikimeve me 244,000 sosh, e ndjekur nga Franca, Spanja, Austria dhe Italia.

BE nën “presion akut”

Personave që ikën nga lufta në Ukrainë u është dhënë statusi i mbrojtjes speciale të përkohshme.

Rreth 4 milionë ukrainas jetojnë në Bashkimin Evropian. Ata nuk janë pjesë e gati një milion kërkesave për azil të paraqitura vitin e kaluar.

Agjencia e Bashkimit Evropian për Azilin (EUAA) thotë se numri i azilkërkuesve po bën “presion akut në vendet e pritjes tashmë të tensionuara në shumë vende”.

Plani i ri i BE-së për migracionin

Raporti vjen ndërkohë që liderët e Bashkimit Evropian po e debatojnë një plan të ri migracioni, veçanërisht për ata që kanë arritur në brigjet evropiane pa një rrugë ligjore.

BE kohët e fundit ka rënë dakord për një plan përmes të cilit i lejon shtetet ose të pranojnë një numër të caktuar migrantësh ose të paguajnë deri në 20,000 euro për çdo person të cilin e refuzojnë.

Megjithatë, Hungaria dhe Polonia e kanë kundërshtuar planin e mësipërm. Kryeministri hungarez Victor Orban i ka thënë televizionit shtetëror javën e kaluar se nuk do ta zbatonin atë plan.

Kancelari gjerman Olaf Scholz ka shprehur besimin në plan, duke thënë se ai u paraqet vendeve anëtare disa opsione.

Plani i migracionit ka qenë veçanërisht në qendër të vëmendjes pasi një anije e mbytur me emigrantë, që besohet të jetë një nga fatkeqësitë më tragjike në Detin Mesdhe kohët e fundit, hodhi dritë mbi krizën e refugjatëve./DW

Subscribe në YouTube: GAZETA INFOKUSI
Etiketa:
E PREMTJA E BARDHË NË ETC ME ZBRITJE DERI 50%
-Advertisement-

Të tjera

Fokusi

lajme