Tri problemet kryesore dhe më problematike në vendin tonë vazhdojnë të jenë papunësia, varfëria dhe korrupsioni.

Nga rezultatet e fundit të anketës virtuale Pulsi Publik i UNDP-së, 37.2 për qind e qytetarëve problem themelor në Kosovë e shohin papunësinë, e ndjekur nga korrupsioni (23.5%) dhe varfëria (15.3%).

Prirje të ngjashme janë vërejtur në nëntor 2019, kur papunësia (31.2%), korrupsioni (19.6%) dhe varfëria (10.5%) u identifikuan si tre problemet themelore me të cilat përballet Kosova.

“Përveç vitit 2017, papunësia, korrupsioni dhe varfëria janë renditur vazhdimisht si treproblemet kryesore dhe themelore me të cilat përballet Kosova”, thotë raporti i UNDP-së.

Gjetjet e tjera tregojnë se 2.4% e të anketuarve konsiderojnë se çmimet e artikujve të domosdoshëm janë problem themelor, 2.1% konsiderojnë krimin e organizuar, dhe 1.8% e të anketuarve konsiderojnë se probleme themelore janë ekonomia informale dhe problemet sociale.

Anketa Pulsi Publik 18 gjen se gjithsej 1.4% e të anketuarve konsiderojnë se kujdesi shëndetësor është çështja më e ngutshme në Kosovë.

Dallimi gjinor për problemet themelore

Ndërkohë që anketa e opinionit prill 2020 nuk shënon ndonjë dallim gjinor mes opinioneve të femrave dhe meshkujve mbi tre problemet themelore – të dhënat e zbërthyera sipas gjinisë tregojnë se femrat (39.3%) janë pak më të shqetësuara sesa meshkujt (35.6%) për papunësinë.

Megjithatë, meshkujt (27.2%) janë më të shqetësuar sesa femrat (19.9%) për korrupsionin. Për fundi, femrat janë pak më të shqetësuara për varfërinë (15.9%) sesa meshkujt (15%).

Serbët e Kosovës, problem themelor i konsiderojnë edhe marrëdhëniet ndëretnike

Të dhënat e zbërthyera sipas përkatësisë etnike tregojnë dallimet në renditjen e problemeve themelore ndërmjet shqiptarëve të Kosovës dhe komuniteteve të tjera të Kosovës nga njëra anë, dhe serbëve të Kosovës nga ana tjetër.

“Shqiptarët e Kosovës dhe pjesëtarët e komuniteteve të tjera të Kosovës kanë renditur papunësinë, korrupsionin dhe varfërinë si tre problemet themelore me të cilat përballet Kosova aktualisht. Për dallim, serbët e Kosovës konsiderojnë se papunësia (38.5%), pasuar nga krimi i organizuar (13.5%), dhe marrëdhëniet ndëretnike (11.5%) janë çështjet më të mëdha në Kosovë”, thotë raporti i Pulsit Publik.

Nga këto rezultate po ashtu gjithsej 15.3 për qind janë deklaruar se ka varfëri në vend, për dallim nga rezultatet e nëntorit të 2019 kur përqindja ishte 10.5 për qind.