Qeveria nuk ka dhënë ‘dritën e gjelbër’ për Asociacionin
Autori: Gazeta inFokus 17:28 | 12 March 2018
Fillimi i procedurave për themelimin e Asociacionit të komunave me shumicë serbe, mbetet në pritje të vendimit të Qeverisë së Kosovës.
Ekipi për menaxhimin e draftimit të statutit për këtë Asociacionin, ende nuk ka ndërmarrë asnjë veprim.
Zyrtarët në Ministrinë e Administrimit të Pushteti Lokal, thonë se ekipi i cili është formuar para dy vjetësh është duke pritur sinjale nga Qeveria e Kosovës për të vazhduar me punën.
Rozafa Ukimeraj-Çuni, Sekretare e Përgjithshme në Ministrinë e Administrimit të Pushtetit Lokal tha për Radion Evropa e Lirë se në këtë ministri nuk kanë ndonjë informacion se si do të shkojnë punët rreth bisedimeve që janë paralajmëruar se do të zhvillohen nga 19 – 21 marsi në Bruksel, për Asociacionin.
“Ministria, sipas marrëveshjes së parë të Brukselit, ka pasur në përgjegjësi themelimin e grupit menaxhues për draftimin e statutit për Asociacionin. Aktualisht nuk kemi ndërmarrë ndonjë veprim konkret. Po presim një sinjal politik nga delegacioni i Kosovës që e përfaqëson Kosovën në bisedimet e Brukselit”, tha Ukimeraj-Çuni.
Pas formimit të delegacionit të ri për bisedimet teknike me Serbinë nga Qeveria Haradinaj, deri më tani, zyrtarët e Ministrisë së Administrimit të Pushtetit Lokal nuk kanë qenë pjesë e bisedimeve. Në të kaluarën, kjo ministri kishte përfaqësuesit e saj në takimet e Brukselit, kur është biseduar për Asociacionin.
Përderisa Qeveria e Kosovës nuk ka një afat të qartë se kur do të nisë procesi i formimit të Asociacionit apo Bashkësisë së komunave me shumicë serbe, zyrtarët e Bashkimit Evropian u kanë kërkuar institucioneve të Kosovës që pa vonesa ta themelojnë Asociacionin.
Maja Kocijançiq, zëdhënëse e Përfaqësueses së lartë të Bashkimit Evropian, Federica Mogherinit ka thënë se dialogu në nivelin teknik, ndërmjet Prishtinës dhe Beogradit, do të vazhdojë pas 10 ditësh.
Në anën tjetër, në Qeverinë e Kosovës, kanë deklaruar po ashtu se Asociacioni do të formohet në bazë të asaj që parasheh Kushtetuta e vendit, duke respektuar edhe të gjeturat e vendimit të Gjykatës Kushtetuese.
Ish-zëvendësministri i Administrimit të Pushtetit Lokal, Bajram Gecaj, nga Lidhja Demokratike e Kosovës tha për Radion Evropa e Lirë se për çështjen e Asociacionit duhet të bisedohet sa me parë në Bruksel dhe sipas tij, zvarritja e këtij procesi nuk është zgjidhje.
“Pra, në Bruksel do të diskutohet dhe unë besoj se duhet të gjendet një zgjidhje sepse zvarritja e kësaj çështjeje nuk zgjidh probleme”, tha Gecaj.
Sipas tij, çështja e Asociacionit duhet të përmbyllet edhe për faktin se dialogu, tashmë po pretendohet se hyn në fazën përfundimtare.
“Ne e kemi marrëveshjen e viti 2013, e kemi marrëveshjen e viti 2015, e kemi vendimin e Gjykatës Kushtetuese, kështu që Asociacioni duhet të jetë në përputhshmëri me këto tri dokumente të rëndësishme”, tha Gecaj.
Megjithatë, ai nuk është shprehur optimist se me Qeverinë aktuale do të ketë ndonjë rezultat pozitiv në procesin e dialogut për Kosovën.
Nga ana tjetër, Jeta Krasniqi nga Instituti Demokratik i Kosovës (KDI) që udhëheq projektin për fuqizimin e rolit mbikëqyrës të Kuvendit ndaj Qeverisë si dhe rritjen e pjesëmarrjes së qytetarëve në procesin e dialogut Kosovë-Serbi, thotë se Asociacioni i komunave me shumicë serbe është pjesë e marrëveshjes së parë të parimeve për normalizimin e marrëdhënieve e cila është ratifikuar në Kuvendin e Kosovës me dy të tretat e votave dhe për parimet e të cilës ka një aktgjykim të Gjykatës Kushtetuese.
“Diskutimet për Asociacionin e komunave pritet të vazhdojnë edhe në të ardhmen. Mbetet e rëndësishme dhe qenësore që pala kosovare të respektojë aktgjykimin e Gjykatës Kushtetuese dhe të mos lejojë në asnjë mënyrë që ky mekanizëm të ndërtojë një nivel të tretë të qeverisjes në Kosovë. Këto bisedime në mes Kosovës dhe Serbisë nuk duhet të cenojnë në asnjë mënyrë funksionimin kushtetues dhe unitar të shtetit të Kosovës”, tha Krasniqi.
Marrëveshja për Asociacionin, ndërmjet Kosovës dhe Serbisë ishte arritur më 25 gusht 2015, por Gjykata Kushtetuese e Kosovës, më 23 dhjetor 2015, pati vlerësuar se disa nga parimet e përgjithshme të marrëveshjes për Asociacionin, nuk ishin në harmoni me Kushtetutën e Kosovës dhe se këto parime duhet të jenë në pajtueshmëri me standardet kushtetuese të Republikës së Kosovës
Të tjera
-
Artmotion dhe DigitAlb arrijnë marrëveshje të re bashkëpunimi pesëvjeçar
Artmotion, platforma lidere në Kosovë, dhe DigitAlb, platforma lidere në Shqi...
-
Arrestohet në Prizren burri me nënshtetësi gjermane, dyshohet për dhunë ndaj familjarëve të tij
Policia e Kosovës ka arrestuar në Prizren një burrë me nënshtetësi gjermane, ...
-
Bajrami ia bën ‘bajat’ ministrit Murati: Sektorit privat ia more taksat dhe i shpërndave si karramele
Deputetja e LDK’së, Hykmete Bajrami i ka reaguar ministrit Hekuran Muratit, d...
-
Aksion i Policisë në Prizren, arrestohen dy të dyshuar për dro*ë e ar*ë
Departamenti i Krimeve të Rënda në Prokurorinë Themelore në Prizren ka njoftu...
-
Prishtina pritet të bëhet me polici të veten brenda vitit
Drejtoria e Policisë për kryeqytet pritet të bëhet brenda këtij viti. Kjo ...
-
Sveçla takohet me Ballën, bien dakord që Policisë së Kosovës t’i bashkohet Taskforca e Përbashkët e Migracionit
Ministri i Punëve të Brendshme, Xhelal Sveçla, me ftesë të homologut i tij, T...
-
Perëndimi duhet të jetë në gjendje lufte
Nga: Anders Fogh Rasmussen, ish-sekretar i përgjithshëm i NATO-s (2009-‘14) d...
-
LAJMI I FUNDIT: Martin Berishaj po intervistohet në Prokurorinë Speciale
Martin Berishaj ambasadori i Kosovës në Kroaci, është duke u intervistuar nga...
-
Gërvalla në Kalabri të Italisë: Të shfrytëzojmë resurset dhe të forcojmë urat e bashkëpunimit
Ministrja e Punëve të Jashtme dhe Diasporës, Donika Gërvalla është duke qëndr...
-
Krasniqi takohet me Gorçeviqin e Malit të Zi, dakordohen për thellim të bashkëpunimeve
Ministri i Administrimit të Pushtetit Lokal, Elbert Krasniqi priti në takim m...
-
Serbi: Raporti i KE-së për Kosovën shihet si gjest armiqësor
Miratimi i raportit që i hap rrugën Kosovës për anëtarësim në Këshilin e Evro...
-
Kroacia nis procedurat për njohjen e patentë shoferëve të Kosovës
Qeveria e Kroacisë ka nisur procedurat për njohjen e ndërsjellë të patentë sh...