Lajme

Punëtorët e Telekomit pa paga nga janari

Autori: H. Smajli 15:34 | 23 February 2021

3 mijë e 400 Punëtorë të Postës dhe Telekomit të Kosovës që nga muaji janar kanë mbetur pa paga, shkruan Gazeta inFokus.

Ata të martën përmes një letre publike dërguar U.d Presidentes të Kosovës, Vjosa Osmani dhe kryeministrit në detyrë, Avdullah Hotit kanë kërkuar që të shpëtojnë Telekomin e Kosovës pasi që sipas tyre është drejt fundosjes.

Në një pikë të kësaj letre ceket që gjysma e punëtorëve të kësaj ndërmarrje publike kanë mbetur pa paga që nga muaji janar.

Kryetari i Sindikatës së Punëtorëve, të kësaj ndërmarrje publike, Lamih Balaj në një prononcim për Gazetën inFokus ka thënë se kanë mbetur pa paga, 2 mijë e 300 punëtorë të Telekomit dhe 1 mijë e 100 punëtorë të postës.

“Janë 2300 punëtorë të Telekomit dhe 1100 të postës që kanë mbetur pa paga prej muajit janar. Dhe është bërë një vit që punëtorët e Telekomit asnjëherë nuk i kanë marrë pagat me kohë”, ka thënë Balaj.

Kjo është thirrja publike që sot gjatë ditës kjo sindikatë i ka bërë krerëve të shtetit që të marrin masa dhe të shpëtojnë Telekomin./Gazeta inFokus/ 

LETËR PUBLIKE

Të tjera