Para një jave presidentja e Kosovës, Vjosa Osmani propozoi që së bashku me SHBA-në të hartohet një draft-statut për Asociacionin e komunave me shumicë serbe, që konsiderohet thelbësor nga bashkësia ndërkombëtare dhe deri tash, s’pati ndonjë të re në këtë drejtim.

Presidentja e Kosovës, Vjosa Osmani ishte në Shtetet e Bashkuara të Amerikës muajin e kaluar dhe pasi u kthye nga atje, propozoi që të dyja vendet së bashku ta përgatisin statutin e Asociacionit të komunave me shumicë serbe.

Në Washington, Asociacioni tashmë konsiderohet çështja thelbësore për t’u zbatuar nga marrëveshja për rrugën e normalizimit të marrëdhënieve mes Kosovës dhe Serbisë dhe Osmani, megjithëse beson se “s’është perfekte”, thekson se është obligim ndërkombëtar.

“Mendoj që zgjidhja është si vijon: Ne duhet të ulemi me SHBA-në, ta përgatisim draftin tonë, draftin e Republikës së Kosovës. Fillimisht (vetëm me SHBA-në), unë mendoj se kështu është zgjidhja, të ulemi me partnerët tanë në SHBA, ta prezantojmë para sekretarit amerikan të Shtetit (Antony Blinken) draftin tonë, i cili është në përputhje me Kushtetutën e Kosovës, në përputhje me vendimin e Gjykatës Kushtetuese, në përputhje me letrën e Mogherinit që garanton se nuk do të ketë kompetenca ekzekutive dhe në përputhje me qëndrimin e shkruar amerikan në opinionin (e shkruar) nga Chollet dhe Escobar që sqarojnë që një trup i tillë do të jetë një trup koordinues, pa kompetenca ekzekutive”, tha Osmani në një intervistë për RTK-në.

Kanë kaluar një javë nga ajo deklaratë dhe nuk ka pasur ndonjë lëvizje në këtë drejtim.

Asociacionin e kërkon para të gjithave edhe BE-ja. Kjo tashmë është kërkesë zyrtare e bllokut europian për Kosovën dhe kryeministrit Albin Kurti i kërkohet ta nisë punën menjëherë.

Kryediplomati europian, Josep Borrell tha se kryeministri i Kosovës, Albin Kurti e refuzoi një propozim të BE-së për zbatimin e marrëveshjes në takimin e 14 shtatorit me presidentin serb, Aleksandar Vuçiq në Bruksel. Propozimi i BE-së e kishte si bazë krijimin e Asociacionit të komunave me shumicë serbe. Nisja e procesit negociues rreth statutit të tij është vendosur në krye të hapave për implementimin e marrëveshjes.

Ndërsa do të niste puna për statutin e Asociacionit, Serbia parashihej të mos insistonte më në përdorimin e asteriksit dhe fusnotës në emrin e Kosovës në forumet rajonale. Strukturat ilegale që veprojnë në Kosovë, sipas propozimit të BE-së, do të ndërprisnin veprimin vetëm pasi punët e tyre do të transferoheshin në Asociacionin e komunave me shumicë serbe.

Pasi Kurti doli dhe e akuzoi publikisht emisarin europian, Miroslav Lajçak se po koordinohej me Vuçiqin në një skenar kundër Kosovës, BE-ja e lëshoi një deklaratë zyrtare për t’i bërë thirrje Kosovës përmes Borrellit që ta nisë pa vonesa të reja dhe pa asnjë parakusht punën për themelimin e Asociacionit.

“BE-ja u kërkon palëve të angazhohen me konstruktivitet dhe mirëbesim. Kjo nënkupton fillimin e zbatimit bazuar në Propozimin e BE-së pa vonesa të mëtejme, që gjithashtu përfshin detyrimin e të dyja palëve për t’i zbatuar plotësisht të gjitha Marrëveshjet e kaluara të Dialogut. Puna për themelimin e Asociacionit/Bashkësisë së Komunave me Shumicë Serbe duhet të fillojë pa ndonjë vonesë apo parakusht të mëtejmë”, thuhej në deklaratën e BE-së.

Deklaratën e mbështetën edhe Mbretëria e Bashkuar, Gjermania e Franca veç e veç, duke konfirmuar se takimi i fundit Kurti-Vuçiq nuk e ka zmbrapsur Perëndimin për të insistuar sërish në zbatim të marrëveshjes për rrugën drejt normalizimit të marrëdhënieve këtë vit.

Refugjatët armenë të pashpresë se mund të kthehen në Nagorno Karabak
Read more

Coffee Show B2B në Zagreb nga Devolli Corporation

Sponsoruar