Lajme

Publikohen fotografi të Martin Berishajt me Kurtin e Konjufcën në ambiente shtëpie

Autori: Gazeta inFokus 13:26 | 26 April 2022

Emri i ambasadorit të Kosovës në Kroaci, Martin Berishaj, u përmend në një skandal të raportuar financiar në Slloveni. Opozita ka kërkuar që ai të shkarkohet, por Qeveria dhe Presidenca i besojnë verisionit të ambasadorit, që u deklarua i mohoi akuzat dhe paralajmëroi padi ndaj televizionit slloven që raportoi.

Berishaj e kishte festuar në selinë e Lëvizjes Vetëvendosje fitoren e jashtëzakonshme në zgjedhjet e 14 shkurtit 2021. Në llogarinë e tij në Facebook, ai poston fotografi me kryeministrin Albin Kurti, të cilin e mbështet.

Disa fotografi të tjera, në ambiente shtëpie, i ka publikuar sot anëtarja e PSD-së, Teutë Rrusta. Në njërën prej tyre, bashkë me ambasadorin Martin Berishaj, përpara një kuzhine, rreth një tavoline shihen edhe kryeministri Albin Kurti e kryeparlamentari Glauk Konjufca.

“Si u bë që njeriu prej të cilit burojnë skemat konspiracioniste të mos ketë fije dyshimi në Martin Berishajn? Albin Kurti edhe shpjegimet gjeopolitike i ka të mbështetura në lidhje të shkurta konspirative. Shpjegimi më i besueshëm deri me tani është që Kurti i din dhe përfiton nga lidhjet biznesore dhe politike të Martinit. Kësi lidhje që përfundojnë duke e shfrytëzuar shfrytëzuesin. Kurti nuk është imun. Siç duket, këto lidhje e forca nuk janë edhe aq kundër Kurtit, sa për ta prishur miqësinë. E për Kosovën kush po lodhët?”, ka shkruar Rrusta.

Të tilla akuza kanë edhe partitë tjera opozitare, që e lidhin këtë skandal me shtrenjtimin e energjisë elektrike dhe e imlikojnë në të edhe kryeministrin.

Sipas televizionit slloven Planet TV, ambasadori kosovar kishte pranuar në llogarinë e kompanisë së tij “MB Consulting” 600 mijë euro nga dega në Beograd e kompanisë energjetike sllovene, “GEN-I”, e të cilat pretendohet se i ka tërhequr në ‘cash’ dhe më pas ia ka dhënë politikanit slloven, Robert Golob.

Këto pretendime i ka mohuar Berishaj, duke paralajmëruar padi ndaj këtij mediumi. Presidenca i ka kërkuar raport dhe e ka ftuar për sqarime në Kosovë ambasadorin, pasi paraprakisht presidentja Vjosa Osmani ka thënë se i beson versionit që Berishaj e ka dhënë në Facebook.

Të tjera