Lajme

PSD: Bislimi po bën drama, ende nuk e ka të qartë punën e Asociacionit

Autori: Gazeta inFokus 20:47 | 15 May 2023

Bardh Ahmeti nga PSD-ja ka folur për takimin e sotëm mes Bislimit dhe Petkoviqit, takim ky i përfunduar pa asnjë rezultat.

Ahmeti në një prononcim për GazetaBlic tha se, procesi i dialogut është futur përbrenda një kornize të caktuar nga e cila sipas tij as Kurti dhe as Vuçiq nuk do të dalin sepse për atë kornizë, pra, krijimin e Asociacionit, janë dakorduar.

“Procesi i dialogut është futur përbrenda një kornize të caktuar nga e cila as Kurti e as Vuçiq nuk do të dalin sepse për atë kornizë, pra, krijimin e Asociacionit, janë dakorduar. Në tavolinë tashmë është njē draft-statut i dorëzuar para palëve nga Ekipi Menaxhues. Siç edhe po shihet nga deklarimet e zyrtarëve të BE-së dhe të shteteve tjera ndihmëse, ky draft është bazë negocimi. Pra, nga ky këtu do të zhvillohen negocimet tash e tutje”, tha Ahmeti.

-Advertisement-

Ahmeti ka kritikuar Bislimin duke thënë se tashmë është e qartë që pa Asociacion nuk do të ketë zhvillime të reja në dialog.

Ahmeti tha se Bislimit i nevojiten dramat që ta justifikojë pranimin e Asociacionit.

“Pa u bë Asociacioni nuk do të ketë zhvillime të reja në dialog. Kjo na është bërë e qartë. Veç kryenegociatori i vendit ende se paska të qartë këtë gjë. Por, atij i nevojitet drama, në mënyrë që, në fund, të justifikoj pranimin e Asociacionit me kinse rezistencën maksimale në dialog. Sigurisht, kjo rezistencë është iluzive; këta tashmë e kanë pranuar Asociacionin. Ngecja e implementimit është karta e fundit që po luajnë. Por, edhe kjo do harxhohet. Në fund, Kosovës po i mbetet një Asociacion jashtëzakonisht i dëmshëm dhe pa asnjë perspektivë për avancim në marrëdhëniet ndërkombëtare”, tha Ahmeti për GazetaBlic.

Subscribe në YouTube: GAZETA INFOKUSI