Lajme

PSD aksion para Qeverisë kundër draft-statutit për Asociacion, konfrontohen edhe me policinë

Autori: Gazeta inFokus 12:10 | 13 Nëntor 2023

Aktivistët e Partisë Socialdemokrate kanë mbajtur një aksion para Qeverisë së Kosovës, duke kundërshtuar draft-statutin për Asociacion.
Aktivistët kanë zëvendësuar flamurin e Kosovës, me një improvizim të një flamuri me dy yje dhe një pjesë e territorit me ngjyrë të bardhë

Gjatë aksionit, ata janë konfrontuar edhe me Policinë e Kosovës.

Kryetari i kësaj partie, Dardan Molliqaj ka thënë se drafti i Asociacionit i pranuar nga kryeministri Albin Kurti dhe presidenti serb, Aleksandar Vuçiq në thelb, e zhbën 17 shkurtin.
“E zhbën Republikën si koncept, ku qytetarët janë të barabartë, tani zhduket barazia. Nga sot edhe flamuri i Kosovës nuk mund të jetë i njëjti. Nga sot flamuri i Kosovës i ka vetëm dy yje. Kemi themeluar një konfederatë të brendshme mes shqiptarëve dhe serbëve, pa pajtimin qytetar. Aksionet tona do të përshkallëzohen, do të kemi edhe protesta”, ka thënë ai.

-Advertisement-

Molliqaj tha se kryeministri Kurti ka pranuar ndarjen në etni, atë shqiptare dhe serbe.

“Pra, nga republika qytetare tani në republikë që ndahet në etni, përmes këtij draft-statuti janë bërë edhe kufij të brendshëm”, tha ai.

Molliqaj paralajmëroi edhe aksione e protesta tjera kundër Asociacionit.