Lajme

Prokuroria Speciale demanton ministren Haxhiu: Deklarim i pavërtetë e tendencioz

Autori: Gazeta inFokus 16:37 | 30 October 2024

Prokuroria Speciale e Republikës së Kosovës ka demantuar deklarimin e ministres Albulena Haxhiu kundër Prokurorisë Speciale lidhur me rastin e pronës milionëshe në Veternik.

Përmes një reagimi, PSRK-ja ka shprehur indinjatë të thellë ndaj qasjes së vazhdueshme joproduktive të Ministres së Drejtësisë, Albulena Haxhiu.

Prokuroria Speciale ka njoftuar se kjo çështja nuk ka qenë asnjëherë në kompetencë të tyre dhe kësisoj sipas prokurorisë, deklarimi i ministres është i pavërtetë dhe tendencioz.

-Advertisement-

“Prokuroria Speciale, deklarimet e tilla të pavërteta, fatkeqësisht nga ministrja e drejtësisë, i konsideron të qëllimshme dhe tendencioze në drejtim të Prokurorisë Speciale dhe punës se suksesshme të udhëheqësit të saj, duke vlerësuar se këto deklarime të pasakta, përveç tjerash kanë për qëllim edhe dezinformimin e opinionit publik, pengimin në punë dhe dëmtimin e imazhit të kësaj prokurorie. Nisur nga fakti se nuk është hera e pare që ballafaqohemi me sulme të tilla dhe deklarata të pavërteta nga ministrja Haxhiu, Prokuroria Speciale, i bën thirrje ministres së drejtësisë dhe të gjithë personave tjerë që kanë synim pengimin e kësaj prokurorie në realizimin e mandatit të saj, që të përmbahen nga deklarime të tilla të pavërteta, tendencioze dhe qëllimkëqija”, thuhet në reagimin e prokurorisë.

Ministrja Haxhiu ka kërkuar hetime ndaj prokurorëve special që sipas saj i kishin mbyllur hetimet ndaj të akuzuarve për rastin e pronës milionëshe në Veternik.

Subscribe në YouTube: GAZETA INFOKUSI
Spektakli i Vitit, Ekskluzivisht në Artmotion – BBVK3!
-Advertisement-

Të tjera

Fokusi

lajme