Të dyshuarit për vrasjen e N.L (39-vjeçar) dhe plagosjen e tre të tjerëve në fshatin Runik të Skenderajt, mbeten ende të paidentifikuar.

Kjo është bërë e ditur për “Betimi për Drejtësi” nga zëdhënësi i Prokurorisë Themelore në Mitrovicë, Valon Preteni.

Ndryshe, Policia e Kosovës (PK) kishte njoftuar se një person ka mbetur i vdekur ndërsa tre të tjerë janë plagosur, si pasojë e të shtënave me armë zjarri në një kafene në Runik të Skenderajt.

-Advertisement-

Lajmin e kishte konfirmuar për “Betimi për Drejtësi“, Avni Zahiti, zëdhënës i Policisë për rajonin e Mitrovicë, i cili tha se rasti ka ndodhur pas mesnatës, ndërsa shtoi se dyshohet se dy persona të maskuar kishin hyrë në kafene, kanë shtënë me armë dhe janë larguar në drejtim të panjohur.

I njëjti theksoi se personi që ndërroi jetë nga të shtënat është N.L (39-vjeçar), kurse tre të lënduarit tjerë janë dërguar për tretman mjekësor në Qendrën Klinike Universitare të Kosovës (QKUK).

“Rreth orës 01:21, të datës 10 gusht 2023, policia ka marrë informatën për të shtëna me armë zjarri në një kafiteri në fshatin Runikë të Skenderajt. Menjëherë në vendin e ngjarjes kanë dalë njësitet e nevojshme policore dhe ekipi mjekësor. Bazuar në hetimet fillestare, nga arma e zjarrit lëndime kanë pësuar katër persona, njëri nga të lënduarit viktima N. L., 39 vjeçar, ka ndërruar jetë në vendngjarje, ndërsa, tre persona të tjerë të lënduar (po ashtu nga arma e zjarrit) janë dërguar për tretman mjekësor në QKUK. Nga hetimet e para dhe këqyrja e vendit të ngjarjes, dyshohet se dy persona të dyshuar e të maskuar kanë hyrë brenda në kafiteri kanë shtënë me armë dhe janë larguar në drejtim të panjohur”, konfirmoi Zahiti.

Sipas Policisë në cilësi të provave materiale në vendin e ngjarjes janë gjetur dhe konfiskuar disa gëzhoja.

“Gjitha veprimet e ndërmarra policore, janë udhëhequr nga prokurori i rastit i cili ka dalë në vend të ngjarjes ndërsa i njëjti ka autorizuar që trupi i pajetë i viktimës të dërgohet në Institutin e Mjekësisë Ligjore. Hetuesit e Sektorit Rajonal, janë duke punuar intensivisht për identifikimin dhe arrestimin e kryesit/ve të veprës si dhe zbardhjen e kësaj vepre penale”, konfirmoi ai.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-