Lajme

Prokurori dhe Mimoza Kusari-Lila jashtë vendit, anulohen dy seancat në rastin e njohur si “Afera e Hidrocentraleve”

Autori: Gazeta inFokus 13:42 | 26 October 2021

Me kërkesë të prokurorit Atdhe Dema dhe të akuzuarës Mimoza Kusari-Lila, pasi që të dy gjenden jashtë vendit, janë anuluar dy seancat e parapara të mbaheshin të martën dhe të mërkurën në Departamentin Special të Gjykatës Themelore në Prishtinë, në rastin e njohur si “Afera e Hidrocentraleve”.

Nga zyra e gjykatësit të rastit Valon Kurtaj, kanë bërë të ditur për “Betimi për Drejtësi”, se anulimin i seancës është bërë me kërkesat e prokurorit Atdhe Dema dhe të akuzuarës Mimoza Kusari-Lila, pasi që të njëjtit janë jashtë vendit.

Seanca e radhës në këtë rast është caktuar të mbahet më 3 nëntor.

-Advertisement-

Shqyrtimi kryesor në këtë rast ka filluar më 1 korrik, gjatë së cilës seancë të akuzuarit janë deklaruar përsëri të pafajshëm për akuzat e PSRK-së.

Ky rast është duke u gjykuar në Departamentin Special të Gjykatës Themelore në Prishtinë, ndërsa kryetar i trupit gjykues është gjykatësi Valon Kurtaj.

Në maj të këtij viti, Gjykata e Apelit kishte njoftuar se e ka lënë në fuqi vendimin e gjykatës së shkallës së parë, që kishte konfirmuar aktakuzën ndaj të akuzuarve Besim Beqaj, Mimoza Kusari-Lila, Dardan Gashi, Nenad Rashiq, Fllanza Hoxha dhe Arben Gjuka.

Përmes një komunikate për media, Apeli kishte njoftuar se ndaj këtyre të akuzuarve do të vazhdojë gjykimi.

Ndryshe, Gjykata Themelore në Prishtinë, në mars të këtij viti ua kishte refuzuar kërkesat për hudhjen e aktakuzës, katër ish-ministrave të Qeverisë Thaçi 2, Besim Beqaj, Mimoza Kusari-Lila, Dardan Gashi dhe Nenad Rashiq, si dhe të akuzuarve Fllanza Hoxha, Arben Gjuka.

Ndërsa, kjo gjykatë kishte pushuar procedurën penale për shkak të parashkrimit relativ të ndjekjes penale për të akuzuarit Fadil Çitakut, Mujë Rugova, Agim Nika, Flamur Keqa, Izet Ibrahimi, Gani Jashari, Burim Besha, Gelor Shala, Naim Hyseni, Avni Alidemaj, Besnik Haziri, Lorik Fejzullahu, dhe Krenar Bujupi, raporton “Betimi për Drejtësi”.

19 të akuzuarit për rastin e njohur si “Afera e Hidrocentraleve”, në shqyrtimin fillestar të mbajtur me 28 tetor 2020, në Gjykatën Themelore në Prishtinë, ishin deklaruar të pafajshëm.

Subscribe në YouTube: GAZETA INFOKUSI