Komisioni për Administratë Publike, Qeverisje Lokale dhe Media ka shqyrtuar projektligjin për Prishtinën, ku ka marrë mbështetje nga anëtarët e Komisionit nga të gjitha partitë.

Projektligji u mbështet në mënyrë unanime dhe iu përcoll Kuvendit për shqyrtim në lexim të parë.

Zëvendësministri i Pushtetit Lokal Bashkim Krasniqi tha se karakteristikat e projektligjit janë pushteti shtesë për kryeqytetin, buxhet shtesë për kryeqytetin.

“Kryeqyteti do të ketë kompetenca shtesë, drejtoria e Policisë  themelon njësinë e Policisë për kryeqytetin, spitalin e kryeqytetit, menaxhimin e ndërmarrjeve publike Projektligji i kryeqytetit paraqet implikime shtesë buxhetore, 4.1 përqind e grantit të përgjithshëm të komunave”, tha Krasniqi.

Deputetja e VV-së Shqipe Pantina tha se projektligji plotëson kushtet pasi Prishtina duhet të ketë trajtim tjetër nga komunat tjera pasi shërbimet administrative e diplomatike janë të koncentruara në kryeqytet.

Pantina theksoi duhet të lihen anash fushata dhe të mos mendojnë kush e udhëheq por ta mbështesin.

Deputeti i Nismës për Kosovën Milaim Zeka theksoi se është lajm i mirë ardhja në Kuvend e këtij projektligji derisa beri fajtor LDK-në e PDK-në të cilat tha se e kanë dhunuar kryeqytetin për 17 vjet dhe nuk kanë bërë asgjë për të.

Mbështetje këtij projektligji i ka dhënë edhe LDK-ja, ku deputeti i saj Imet Rrahmani tha se do të japin maksimumin për të bërë një projektligj të mirë për Prishtinën.

Ai theksoi se është sfidë e madhe ndërtimi i Spitalit të Prishtinës për dy vite duke pasur parasysh implikimet buxhetore.

Riza Shillova nga Policia e Kosovës tha se ata kanë dhënë komentet e tyre rreth projektligjit për kryeqytetit. Ai tha se në parim janë për t’i forcuar kapacitetet e Policisë për sigurinë në Prishtinë, por tha se ky ligj duhet të jetë në harmoni me ligjin për Policinë dhe Kushtetutën.

Shillova tha se kompetencat e policisë rregullohet me ligjin e Policisë dhe jo me ligje tjera siç parasheh projektligji për Prishtinën që Policia ta themelojë drejtorinë rajonale për kryeqytetin.

Prandaj sipas tij kjo duhet të harmonizohet me ligjin e Policisë.

Kryetari i Komisionit Nait Hasani tha se ky projektligj nuk i plotëson kriteret për të qenë ligj për kryeqytetin. Por tha se do ta kalojnë mirëpo duhet që përmes diskutimeve publike ta ndryshojnë ndoshta deri në 50 për qind këtë projektligj.

Prince Caffe pjesëmarrës në panairin “Gulfood Fair 2024” në Dubai

Sponsoruar