Lajme

Procesi i Vetingut në drejtësi ka filluar rrugën drejt finalizimit

Autori: Gazeta inFokus 08:23 | 05 August 2022

Procesi i Vetingut në drejtësi ka filluar rrugën drejt finalizimit. Që ky proces të përfundohet me sukses, përveç për votat e komuniteteve, shumica parlamentare ka nevojë edhe për përkrahjen e opozitës. Njohës të sistemit të drejtësisë thonë se partia në pushtet duhet t’i bindë deputetët që të japin votën pro vetingut. Në Vetëvendosje dhe në Qeveri thonë se po punojnë në këtë drejtim.

I shumë përfoluri viteve të fundit, Vetingu në sistemin e drejtësisë, i cili po konsiderohet si shumë i nevojshëm për Kosovën, ka filluar rrugën drejt finalizimit.

Që të përmbyllet me sukses kjo nismë e Ministrisë së Drejtësisë, që në zgjedhjet e fundit ishte edhe premtim elektoral i Lëvizjes Vetëvendosje, janë të nevojshme ndryshimet kushtetuese, për çka, përveç votave të dy të tretave të deputetëve të komuniteteve, nevojitet edhe përkrahje e një pjese të opozitës.

Për këtë, juristi Gëzim Shala, nga Instituti i Kosovës për Drejtësi, thotë se shumica parlamentare duhet të punojë që t’i bindë deputetët që të japin votën pro vetingut.

“Definitivisht i takon shumicës parlamentare dhe Qeverisë që të zhvillojë bisedime dhe të bindë opozitën dhe komunitetet joshumicë që të japin votën për vetingun. Nëse nuk arrihet që të ndryshohet kushtetuta, sipas procedurës, e cila është konsiderueshëm e vështirë për t’u kaluar, Vetingu nuk mund të bëhet. Nëse nuk ka një dakordim të tillë, në mënyrë që të sigurohen 2/3 e votave të të gjithë deputetëve, një proces i tillë nuk mund të përmbyllet”, tha Shala për Radio Kosovën.

Deputeti i Lëvizjes Vetëvendosje, njëherësh kryesues i Komisionit për Legjislacion, Adnan Rrustemi, teksa ka përmendur disa takime të zhvilluara ndërmjet kryeministrit Albin Kurti, ministres së Drejtësisë, Albulena Haxhiu, dhe opozitës, thotë për Radio Kosovës se janë duke punuar me të gjithë që Vetingu të përmbyllet me sukses.

“Vetingu është domosdoshmëri shoqërore dhe institucionale në Kosovës. Si i tillë do të realizohet me njërin ose opsionin tjetër. Unë uroj dhe shpresoj që kjo të ndodhë me ndryshime kushtetuese. Nuk do ta kuptoja refuzimin e asnjë grupi parlamentar. Çfarëdo preokupimi që mund të kenë, jemi të gatshëm që ta diskutojmë. Besoj se Vetingu do të kalojë, por megjithatë presim që të kemi takime dhe t’i sqarojmë të gjitha gjërat”, tha ai.

Edhe nga Ministria e Drejtësisë kanë treguar se lidhur me Vetingun në drejtësi kanë zhvilluar disa takime me përfaqësues politikë e jo vetëm.

“Pas pranimit të opinionit final, procesi i Vetingut përmban afate të reja dhe do të vazhdojë të trajtohet tutje me prioritet, në përputhje me rekomandimet e Komisionit të Venecias, në bashkëpunim më të gjithë akterët relevantë të drejtësisë dhe ata politikë, si dhe në bashkëpunim me partneret ndërkombëtarë”, thuhet në përgjigjen për Radio Kosovën.

Ndërkohë, në lidhje me mënyrën se si Ministria e Drejtësisë po mendon të zhvillojë procesin e Vetingut, opozitarët, Këshilli Gjyqësor i Kosovës dhe ai prokurorial, tashmë kanë shprehur kundërshtimet e tyre.

Të tjera