Për shkak se F.B., dhe S.M., të cilët akuzohen se kanë privuar nga jeta vajzën e tyre tremuajshe, e kishin marrë me vete në seancë foshnjën tremuajshe, është ndërprerë seanca e së martës në Gjykatën Themelore në Prizren.

F.B., dhe S.M., po akuzohen se më 13 shtator 2014, në shtëpinë e tyre në fshatin Lubovec në Skenderaj, e kanë goditur me mjet të fortë mbretës vajzën e tyre tremuajshe A.R., nga të cilat plagë kishte vdekur dhe e kishin varrosur në varrezat e atë fshatit, raporton “Betimi për Drejtësi”.

Fillimisht, kryetarja e trupit gjykues, Teuta Krusha ka bërë të ditur se në sallën e gjykimit është prezente edhe foshnja tremuajsh e të akuzuarve, andaj kërkoi nga palët që të deklarohen në lidhje me këtë situatë.

Prokurori Mehdi Sefa gjatë senacës ka thënë se është kundër që të vazhdojë shqyrtimi gjyqësor për arsye të prezencës së foshnjës në sallën e gjykimit dhe nëse nuk bëhet një zgjidhje për foshnjën, atëherë nuk ka mundësi që të mbahet seanca e sotme.

Gjithashtu, edhe mbrojtësit e viktimave Ali Ahmetaj dhe Ylli Veliqi, kanë mbështetur fjalën e prokurorit Sefa, duke thënë se prezenca e foshnjës është pengesë për mbarëvajtjen e shqyrtimit gjyqësor.

Në anën tjetër, mbrojtësit e të akuzuarve, avokatët Vehbi Beqiri dhe Isa Hyseni, kanë deklaruar se nuk kanë qenë në dijeni në lidhjen me prezencën e foshnjës në seancë dhe se nuk do të kundërshtojnë vendimin që do e marrë trupi gjykues.

Ndërsa, e akuzuar B., ka deklaruar se i mbështetë fjalët e avokatit, teksa shtoi se nuk kishte kujt t’ia lë foshnjën.

Më pas, gjyqtarja Krusha ka marrë vendim që seanca e sotme të ndërpritet dhe e radhës të caktohet pasi foshnja të ketë mbushur gjashtë muaj. Gjithashtu, e akuzuara u obligua që t’ia dorëzojë gjykatës certifikatën e lindjes së foshnjës.

Ndryshe, sipas aktakuzës së Prokurorisë Themelore në Mitrovicë, Departamenti i Krimeve të Rënda, e ngritur më 12 tetor 2015, F.B., dhe S.R., akuzohen se më 13 shtator 2014, në shtëpinë e tyre në fshatin Lubovec të Skenderajt, së bashku për motive të ulëta, me dashje kanë privuar nga jeta fëmiun e tyre tremuajsh, tani të ndjerën A.R.

Aktakuza thotë që B., dhe R., me mjet të fortë mbretës e kanë goditur në kokë të ndjerën A.R, me ç’rast ka pësuar thyerjen e kockës së kraniumit dhe gjakderdhje intrakraniale nga të cilat plagë ka vdekur dhe menjëherë e kanë varrosur në varrezat e fshatit Lubovec.

Për këto veprime, ata po akuzohen se në bashkëkryerje kanë kryer veprën penale “Vrasje e rëndë” nga neni 179 lidhur me nenin 31 të KPRK-së.

Po ashtu, ata po ngarkohen se së bashku për motive të ulëta, me dashje kanë tentuar që të privojnë nga jeta fëmiun e tyre tremuajsh, të dëmtuarën A.R, në atë mënyrë që me mjet të fortë mbretës e kishin goditur në kokë, me ç’rast e njëjta kishte pësuar plagë të rënda trupore, frakturë të dyfishtë në kokë.

Për këto veprime, ata po akuzohen se në bashkëkryerje kanë kryer veprën penale “Vrasje e rëndë në tentativë” nga neni 179 lidhur me nenin 28 e 31 të KPRK-së.